Keıbir jastar ne sebepti áskerge barǵysy kelmeıdi – mınıstrdiń orynbasary jaýap berdi

ASTANA. KAZINFORM – Qorǵanys mınıstriniń birinshi orynbasary Sultan Qamaletdınov keıbir jastar ne sebepti áskerge barǵysy kelmeıtini týraly suraqqa jaýap berdi.

Búgin Senattyń jalpy otyrysynan keıin tilshiler «elimizdiń óńirlerinde keıbir jastardyń áskerge barýdan bas tartýynyń sebebin anyqtadyńyzdar ma?» dep surady.

- Kóptegen sebep bar. Birinshiden, ár adam óz ortasynda, belgili bir ujymda tárbıelenedi. Bul rette otbasynda, balabaqsha men mektepte tárbıe men tálim alady. Olardyń keıbirinde úreı bolady. Sebebi óz úıindegi jaıly ómirge, erkindikke, ómiriniń qalypty reglamentine úırenip alǵan jastar áskerdegi jańa tártipke seskene qaraıdy, ıaǵnı múldem basqa ortaǵa túsedi. Bul - qalypty qubylys. Kelesi mańyzdy másele - osy adamnyń bul úreıdi qalaı jeńýine qatysty. Atap aıtqanda, bul jaǵdaıdy bizdiń ortaq problemamyz dep sanaımyz jáne ony birlese eńseretin bolamyz, - dedi S. Qamaletdınov.

Sonymen qatar tilshiler «jastardyń áskerge barýdan tartynýyna áskerı qyzmetkerlerdiń ólimi jaǵdaılary qanshalyqty áser etip otyr» dep surady.

— Ókinishke qaraı, adamdardyń áskerden basqa da salalarda da ómiri qıylyp jatady. Qaıǵyly jaǵdaılar mektepterde, balabaqshalarda, joldardaǵy kólik apatynda da kezdesedi. Sondyqtan tek áskerdegi jaǵdaıǵa ǵana ekpin qoıý durys emes. Qarýly Kúshterdegi mundaı jaǵdaılardyń aıtarlyqtaı azaıǵanyn kórsetetin statıstıka bar, - dedi mınıstrdiń birinshi orynbasary.

Eske salsaq, bıyl 19 mamyrda Aıagóz qalasynyń ortalyq aýdandyq aýrýhanasynda merzimdi áskerı qyzmetshi bakterıaldy menıngıttiń gıpertoksıkalyq túrinen qaıtys boldy.