Keıbir járdemaqy 3 jylda 1 ret qana kóteriledi — Shegaı sebebin túsindirdi
ASTANA. KAZINFORM — Elimizdiń 2027 jylǵa arnalǵan bıýdjet jobasynda keıbir járdemaqyny esepteý kezinde aılyq eseptik kórsetkish pen eń tómengi kúnkóris deńgeıi burynǵy mólsherlememen eseptelinbek. Mundaı sheshimniń sebebin Eńbek jáne halyqty áleýmettik qorǵaý vıtse-mınıstri Vıktorııa Shegaı túsindirdi.
Quryltaıdyń Qarjy jáne bıýdjet komıteti otyrysynda 2027–2029 jyldarǵa arnalǵan respýblıkalyq bıýdjet týraly zań jobasyn tanystyrylyp, sol kezde depýtat Aıjan Sqaqova AEK pen eń tómengi kúnkóris deńgeıine baılanysty esepteletin keıbir járdemaqy úshin ótken jylǵy kórsetkishter qoldanylatyna nazar aýdardy. Bul rette 2027 jyly zeınetaqy 8,5 paıyzǵa ındeksatsııalanady.
Bul sheshim sebebin Eńbek vıtse-mınıstri Vıktorııa Shegaı túsindirdi. Onyń aıtýynsha, mundaı tásil bıýdjettiń áleýmettik baǵytyna qaıshy kelmeıdi.
— Járdemaqy — azamattar belgili bir ómirlik qıyn jaǵdaıǵa tap bolǵan kezde memleket tarapynan kórsetiletin áleýmettik qorǵaý sharalarynyń bir bóligi ǵana. Keıbir áleýmettik tólemderdi avtomatty túrde ındeksatsııalaý olardy alýshylardyń jalpy ál-aýqaty men ekonomıkalyq derbestigin aıtarlyqtaı jaqsartpaýy múmkin. Sondyqtan mundaı járdemaqylardy qaıta ındeksatsııalaýdy basqa orta merzimdi kezeńde, atap aıtqanda, úsh jylda bir ret júrgizý týraly sheshim qabyldandy, — dedi Vıktorııa Shegaı.
Sonymen qatar ol Úkimet qıyn ómirlik jaǵdaıǵa tap bolǵan otbasylardy qoldaý jáne olardy áleýmettik muqtajdyq jaǵdaıynan shyǵarýǵa baǵyttalǵan sharalardy jetildirýdi jalǵastyratynyn aıtty.
— Buǵan qosa respýblıkalyq bıýdjet jobasynda zeınetaqy men járdemaqylardy tóleýge qatysty barlyq mindetteme tolyq kólemde qarastyrylǵan. Osylaısha, atalǵan azamattardyń jaǵdaıynyń nasharlaýyna jol bermeý jáne áleýmettik tólemder mólsherin tómendetpeý qaǵıdaty tolyq saqtalady dep esepteımiz, — dedi vıtse-mınıstr.
Buǵan deıin jumyssyz qalǵandarǵa tólenetin járdemaqy merzimi qysqarýy múmkin ekenin jazdyq.
