Keıbir sharýalar jeńildetilgen dızel alýǵa ótinim berip úlgermedi – Aıdarbek Saparov
ASTANA. KAZINFORM – Oblystardyń ákimdikteri dızel otynynyń bólinetin kólemin tıep-jóneltý jumystaryn jandandyrýy qajet. Bul týraly Úkimet otyrysynda Aýyl sharýashylyǵy mınıstri Aıdarbek Saparov aıtty.
«Kóktemgi naýqandy tehnıkalyq qamtamasyz etýge keletin bolsaq, egis naýqanyn júrgizý úshin aýyl sharýashylyǵy quralymdarynda 149,9 myń traktor, 5,0 myńǵa jýyq joǵary ónimdi egis keshenderi, 76,4 myń tuqym sepkish, 219,1 myń topyraq óńdeý quraldary bar. Búginde óńirlerdiń aqparaty boıynsha tehnıkanyń daıyndyǵy shamamen 85 paıyzdy quraıdy. Jappaı egis jumystary bastalatyn kezde tehnıka 100 paıyz daıyn bolady. Ótken aptada mınıstrlik keńes ótkizgenin atap ótkim keledi. Onda otandyq aýyl sharýashylyǵy tehnıkasyn óndirýshilermen qosalqy bólshekterdi ýaqtyly jetkizý jáne olarǵa qolaıly baǵa belgileýdi qalyptastyrý máseleleri talqylandy», - dedi Aıdarbek Saparov.
Sonymen qatar mınıstr 2024 jylǵy kóktemgi dala jumystaryn júrgizýge jeńildetilgen dızel otynynyń kólemin qalyptastyrý alǵash ret gosagro.kz portaly arqyly sharýalardyń elektrondyq ótinimderi negizinde júzege asyrylǵanyn atap ótti.
«Respýblıka boıynsha barlyǵy 340 myń tonna dızel otyny kólemine jıyntyq ótinim qalyptastyryldy. Jıyntyq ótinim negizinde Energetıka mınıstrligi dızel otynyn tıep-jóneltý boıynsha munaı óńdeý zaýyttaryna oblystardy bekitip berý grafıgin, sondaı-aq jeńildikti dızel otynynyń qunyn lıtrine 250 teńge deńgeıinde bekitti. 26 naýryzdaǵy málimetke sáıkes, munaı óńdeý zaýyttarynan óńirlerge barlyǵy 67,7 myń tonna dızel otyny tıep-jóneltildi. Oblystardyń ákimdikteri dızel otynynyń bólinetin kólemin tıep-jóneltý jumystaryn jandandyrýy qajet», - dedi ol.
Onyń atap ótýinshe, qazirgi ýaqytta ótinim berý jáne jeńildikti dızel otynyn alý rásimi tolyǵymen tsıfrlandyrylǵan. Biraq jekelegen sharýalar kórsetilgen merzimderde ótinim berip úlgermedi.
«Osyǵan baılanysty, jekelegen óńirlerdegi ákimdikter jáne fermerler ótinimder qabyldaýdy qosymsha ashý máselesin kóterýde. Energetıka mınıstrliginen oblystar ákimdikteriniń usynystaryn qoldaýdy suraımyn», - dedi mınıstr.
