Keıbir óńirler «Dıplommen – aýylǵa» barǵan jas mamandarǵa birjolǵy tólem máselesin sheshpeı otyr - DSM

ASTANA. KAZINFORM – Densaýlyq saqtaý mınıstri Aqmaral Álnazarova Úkimet otyrysynda «Dıplommen – aýylǵa» baǵdarlamasyna beıjaı qarap otyrǵan óńirler bar ekenin aıtty.

- Aýyldyq eldi mekenderge jumys isteý úshin kelgen densaýlyq saqtaý mamandaryna «Dıplommen – aýylǵa» baǵdarlamasy aıasynda áleýmettik qoldaý sharalary kórsetiledi. Sondaı-aq medıtsına qyzmetkerleriniń mártebesin arttyrý úshin áleýmettik kepildikter men yntalandyrýshy tólemder paketi keńeıtildi. Máselen, 2024 jyldan bastap aýyldyq jerge jumysqa keletin asa tapshy mamandyqtardyń medıtsına qyzmetkerlerine 100 aılyq eń tómengi jalaqy ıaǵnı 8,5 mln teńge mólsherinde birjolǵy aqshalaı tólemdi kózdeıtin norma iske asyrylyp jatyr. Alaıda búginde tólemderdi tóleý boıynsha sheshimder keıbir óńirlerde áli kúnge deıin qabyldanbaǵan, - dedi vedomstvo basshysy.

Sondaı-aq, ol «Aýyldaǵy densaýlyq saqtaý júıesin jańǵyrtý» ulttyq pılottyq jobasynyń aıasynda salynýǵa tıis bolǵan 32 kópbeıindi ortalyq aýdandyq aýrýhananyń altaýy ǵana salynyp bitkenin aıtty.

- 2025 jyldyń sońyna deıin taǵy 12 kópbeıindi ortalyq aýdandyq aýrýhanany paıdalanýǵa berý josparlanyp otyr. Oǵan 98 medıtsına qyzmetkerin daıarlap jiberý josparlanǵan, - dedi Aqmaral Álnazarova.

Buǵan deıin Pavlodar aýyldarynda qaıtarylǵan aktıvter esebinen ambýlatorııalar salynatynyn jazǵan edik.