Keıbir mekteptiń smartfonǵa shekteý qoıý sheshimi ǵylymı negizdelgen qadam — Aımaǵambetov

ASTANA. KAZINFORM — Májilis depýtaty Ashat Aımaǵambetov bilim berý oshaqtarynda gadjet qoldanýǵa tyıym salý ıdeıasyn qoldaıdy.

— Andjela Dakvorttyń oılary unady. Bul vıdeoda ol tabys pen tıimdiliktiń syry — temirdeı erik-jigerde emes, alańdatatyn faktorlardan arylǵan durys ortada ekenin aıtady. Demek, ózińdi únemi baqylap, tyıýdyń ornyna, sol jaǵdaıdyń aldyn alyp, alańdatatyn faktorlardan alys bolý áldeqaıda tıimdi. Mysaly, gadjet — qazir eń basty nazar buzýshy quraldardyń biri. Dakvort keltirgen zertteýge súıensek, tipti óshirýli bolǵanymen, qol astynda jatqan telefonnyń ózi IQ test nátıjesine keri áser etedi. Al telefony kózden tasa jerde jatqan stýdentterdiń úlgerimi áldeqaıda joǵary, — dep jazdy Ashat Aımaǵambetov Telegram paraqshasynda.

Halyq qalaýlysyna The Anxious Generation kitabyn oqyǵannan keıin, mektep jasyndaǵy balalarǵa smartfonnyń áseri men tyıym salý týraly oı kelgen.

— Osy turǵyda Nazarbaev zııatkerlik mektepteri men keıbir mekteptiń jańa oqý jylynan bastap smartfon qoldanýǵa shekteý qoıý týraly sheshimi — oryndy ári ǵylymı dálelderge negizdelgen qadam. Zertteýler mundaı sheshimniń qajettiligin naqty kórsetip otyr, — deıdi depýtat.

Aıta keteıik, Ashat Aımaǵambetov óskeleń urpaqty ilim-bilimge baýlý máselesin únemi kóterip keledi. Depýtat Májilistiń jalpy otyrysynda «smartfon kitaptan arzan bolmaýy kerek» degen edi.