Keıbir qurylys materıaldary boıynsha tolyq ımportqa táýeldimiz – mınıstr

ASTANA. KAZINFORM – Premer-Mınıstrdiń orynbasary-Ulttyq ekonomıka mınıstri Nurlan Baıbazarov qurylys salasynda elimizde shyǵarylǵan materıaldardy paıdalanýdyń úlesin arttyrýǵa mán beriletinin aıtty. 

«Jaıly mektepter qurylysyna otandyq materıaldardy qoldaný máselesin jýyrda Úkimet otyrysynda arnaıy qarastyrdyq. Joba operatory «Samruk-Kazyna Construction» kompanııasyna qazaqstandyq qurylys materıaldarymen qamtýdy ulǵaıtý jóninde naqty tapsyrmalar berildi. Bul másele baqylaýda, atqarylǵan jumystar boıynsha esep berý kúnin, Úkimettiń taǵy bir keńes ótkizýdi belgiledik. Meniń oıymsha, jazǵa jaqyn, bul jumystyń nátıjesin egjeı-tegjeıli qarastyramyz jáne baǵasyn beremiz», - dedi Nurlan Baıbazarov Úkimet otyrysynan keıin ótken baspasóz máslıhatynda.

Mınıstrdiń aıtýynsha, qurylys salasynda otandyq materıaldardy qoldaný talaby engiziledi. Ol úshin Úkimette tıisti zańnamalyq sharalardy qabyldaý qaralyp jatyr. 

«Qurylys salasynda keıbir materıaldar boıynsha bizde tolyq ımportqa táýeldilik bar. Ázirge ımportqa táýeldilik boıynsha biz eshteńe isteı almaımyz. Biraq, bul baǵyttaǵy ınvestıtsııalyq jobalarǵa nazar aýdaramyz», - deıdi ol.