Keıbir qojalyqtardyń astyq shyǵymy gektaryna 40 tsentnerge jetti - mınıstr

ASTANA. KAZINFORM – Aýyl sharýashylyǵy mınıstri Aıdarbek Saparov aýyl sharýashylyǵy qyzmetkerleriniń birinshi forýmynda egis naýqanynyń qorytyndysyn málim etti.

«Kórsetilgen qoldaýdyń arqasynda, bıyl Qazaqstan rekordtyq 26,7 mln tonna astyq jınady. 560 myń tonnadan asa kúrish, 290 myń tonnadan astam maqta, 2,9 mln tonna kartop, 3,9 mln tonna kókónis jáne 3,2 mln tonna maıly daqyl jınaldy. Bul - Qazaqstannyń ishki naryq qajettiligin jabýǵa jáne eksporttyq áleýetti kóterýge múmkindik beredi», - dedi mınıstr.

Onyń paıymdaýynsha, saladaǵy ortasha daqyl ónimdiliginiń joǵary bolýy memleket pen bıznestiń birlesken jumysynyń arqasynda tirkelip otyr.

«Agrotehnologııa saqtaǵan sharýashylyqtarda ónimdilik gektaryna 20-dan 40 tsentnerge deıin jetti. Al agrotehnologııalardy ustanbaǵan kórshi sharýashylyqtarda bul kórsetkish gektaryna 6 tsentnerden aspady. Bul aıyrmashylyqtar agrosektordy odan ári jańǵyrtýdyń jáne búkil el boıynsha óndiris jaǵdaılaryn teńestirýdiń mańyzdylyǵyn kórsetedi», - dedi Aıdarbek Saparov.