Keıbir kópbalaly otbasy qosymsha memlekettik qoldaýdan qaǵylady
ASTANA. KAZINFORM — Elimizde kópbalaly otbasylarǵa beriletin keıbir qosymsha memlekettik qoldaý sharalary qaıta qaraldy. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti.
— Eger kópbalaly otbasynyń turmys deńgeıi joǵary bolsa, ıaǵnı otbasy músheleriniń jan basyna shaqqandaǵy tabysy 4 eń tómengi kúnkóris deńgeıinen assa, bul degenimiz ár adamǵa shaqqanda 200 myń teńgeden artyq degen sóz. Mysaly, 10 adamnan turatyn otbasy jalpy 2 mıllıon teńge tabys tapsa, eki jáne odan da kóp jyljymaıtyn múlki, eki jáne odan da kóp avtokóligi bolsa, ol joǵary turmys deńgeıindegi otbasy bolyp sanalady. Bul sanattaǵy otbasylar, kópbalaly mártebesine qaramastan, qosymsha qoldaý sharalaryn ala almaıdy, — dedi Svetlana Jaqypova Parlamenttiń birlesken otyrysynan keıin BAQ ókilderiniń saýalyna jaýap bere turyp.
Sondaı-aq mınıstr keıbir kópbalaly otbasy qaǵylatyn qosymsha qoldaý sharanyń arajigin ajyratyp berdi.
— Mysal, belgili bir merekege oraı birjolǵy tólem berilmeıdi. Sol sekildi 8 naýryzda kópbalaly analardy quttyqtaý nemese mektepke qajetti portfel men basqa da qural-jabdyq berý. Olar endi ózderi qamtamasyz etedi. Jalpy kópbalaly ana mártebesine baılanysty tólenetin barlyq tólem sol kúıinde saqtalady, burynǵydaı ala beredi. Máselen, 10 balasy bar kópbalaly otbasyǵa beriletin aı saıynǵy tólem 120 myń teńgeden astam, ıaǵnı ár balaǵa 15 myń teńge alýdy jalǵastyrady, — dep túsindirdi vedomstvo basshysy.
Buǵan deıin kópbalaly otbasylar men marapattalǵan analarǵa qandaı járdemaqy tólenetini týraly jazǵan edik.
Aıta keteıik, bıyl elimizde alty aıdyń ishinde kópbalaly otbasylar men nagradtalǵan analar 253 mlrd teńgeden astam járdemaqy aldy.