Keıbir qazaqstandyqtar úshin zeınetaqy tóleminiń jańa tártibi engiziledi

ASTANA. KAZINFORM – Qarjy naryǵyn retteý jáne damytý agenttigi erikti zeınetaqy jarnalary esebinen zeınetaqymen qamsyzdandyrý týraly shart jasasý qaǵıdalary men onyń úlgilik nysanyna ózgerister engizdi.

Jobada erikti zeınetaqy jarnalary (EZJ) esebinen zeınetaqymen qamsyzdandyrý shartynyń úlgilik nysanyna, onyń ishinde «Biryńǵaı jınaqtaýshy zeınetaqy qory» AQ-tan (BJZQ) tólemder tártibine qatysty bóliginde ózgerister engizý usynylady. 

- Atap aıtqanda, zeınetkerlik jasqa jetken, biraq erikti zeınetaqy jarnalary (EZJ) esebinen qalyptasqan jınaǵyn alýǵa júginbegen azamattar úshin BJZQ-dan zeınetaqy tólemderin avtomatty (ótinishsiz) tártippen júzege asyrý josparlanyp otyr. Osy tetikti iske asyrý erikti zeınetaqy jarnalary boıynsha talap etilmegen zeınetaqy jınaqtyń aldyn alyp, zeınetaqy tólemderiniń barlyq túrine birdeı kózqarasty qamtamasyz etýge múmkindik beredi, - delingen habarlamada. 

Joba «Qazaqstan Respýblıkasynyń keıbir zańnamalyq aktilerine qarjy naryǵyn damytý, qarjylyq kórsetiletin qyzmetterdi tutynýshylarynyń quqyqtaryn qorǵaý, baılanys jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» QR Zańyn iske asyrý sheńberinde ázirlendi.

Qujattyń tolyq mátinimen Qarjy naryǵyn retteý jáne damytý agenttiginiń ınternet-resýrsynda tanysýǵa bolady. 

Ulttyq banktiń málimeti boıynsha, 2014 jyldan beri elimizde zeınetaqy aktıvteri 5 eseden asa ósti. 

Aıta keteıik, qazaqstandyqtar qaıtadan zeınetaqy jınaǵyna tisin jáne balalaryn emdete alady.