Keıbir qazaqstandyq alǵan zeınetaqysyn qaıtarýǵa mindetteledi

ASTANA. KAZINFORM — Qos azamattyǵy bar qazaqstandyqtar elimizde zańsyz túrde zeınetaqy alyp kelgen bolsa, olar bul qarjyny bıýdjetke qaıtarýy tıis bolady. Tolyǵyraq Eńbek jáne halyqty áleýmettik qorǵaý mınıstri Svetlana Jaqypova túsindirdi. 

— Zalaldyń mólsherin ýákiletti organ, ıaǵnı Qarjylyq monıtorıng agenttigi anyqtaýy kerek. Barlyq materıal tapsyryldy, qazir tergeý júrip jatyr jáne soma qaıta óndirilip alynady, — dedi Svetlana Jaqypova Májilistiń jalpy otyrysynan keıin ótken baspasóz máslıhatynda.

Mınıstr túsindirip ótkendeı, jańa erejeniń Qazaqstanda tirkeýi bar jáne shetelge tek ýaqytsha shyqqan zeınetkerlerge qatysy joq. Mundaı jaǵdaıda tólem ýaqytsha toqtatylýy múmkin, alaıda elge oralǵannan keıin tolyq kólemde tólenedi. 

— Keıbir zeınetkerdiń bir mezette Qazaqstanda, Reseıde jáne Ózbekstanda zeınetaqy alyp kelgen jaǵdaı boldy, — dep tolyqtyrdy vedomstvo basshysy.

Buǵan deıin turǵylyqty jerin aýystyrǵan azamattarǵa zeınetaqy tóleý júıesi ózgeretini týraly habarlaǵan edik. 

Aıta keteıik, Eńbek jáne halyqty áleýmettik qorǵaý mınıstrligi zeınetaqy júıesin reformalaýǵa kiristi.