Keıbir kanaldaǵy sýdyń 50-60 paıyzy dalaǵa ketip jatyr — Toqaev
ASTANA. KAZINFORM — Memleket basshysy Qasym-Jomart Toqaev Úkimetke sý resýrstarynyń biryńǵaı tsıfrlyq platformasyn jasaý mindetin júktedi.
— Sý máselesin sheshý — áleýmettik turaqtylyqty saqtap, ekonomıkany damytýdyń kepili. Bul — ulttyq qaýipsizdikti qamtamasyz etetin basty faktordyń biri. Biz sońǵy eki jylda osy salanyń ınstıtýtsıonaldyq negizin qalyptastyrdyq. Atap aıtqanda, Sý kodeksi qabyldandy, arnaıy mınıstrlik quryldy. Bul mekemeniń aldynda aýqymdy mindetter tur. Oǵan ústirtin qaramaý kerek. Osy jumyspen júıeli túrde jáne jan-jaqty aınalysý qajet. Osyǵan oraı kásibı kadrlardy daıyndaý kerek, sý dıplomatııasymen aınalysatyn mamandardy ázirleý qajet, — dedi Qasym-Jomart Toqaev Qazaqstan halqyna Joldaýynda.
Memleket basshysynyń aıtýynsha, qazir quzyrly organdarda elimizdegi sý resýrstarynyń qoljetimdi kólemi týraly naqty málimet joq.
— Keıbir kanaldaǵy sýdyń 50-60 paıyzy dalaǵa ketip jatyr. Sýdy esepke alý tehnologııasy ábden eskirgen. Sýdy bólip taratatyn oryndarda qazirgi zamanǵa saı qurylǵylar joq. Shyn máninde, sý — strategııalyq mańyzy bar resýrs, sýsyz ómir joq. Sondyqtan bul sala ulttyq tsıfrlyq jańǵyrý jumysyndaǵy basty baǵyttyń biri bolýǵa tıis. Sý resýrstarynyń biryńǵaı tsıfrlyq platformasyn jasaý kerek. Platformada jasandy ıntellekt negizinde jerústi jáne jerasty sýlary týraly málimet jınaqtalady. Sondaı-aq kanaldardyń, sý qoımalary men bógetterdiń jaı-kúıi jónindegi aqparat bolady. Joba iske qosylǵanda gıdrogeologııa monıtorıngi, ıaǵnı baqylaý jumysyna qatysty másele tolyq sheshimin tabady. Osy jumys Ulttyq sý teńgerimin qalyptastyrý isimen qatar júrgizilýge tıis. Bul — uzaq merzimge arnalǵan sý saıasatyn josparlaýdyń asa mańyzdy tásili. Onsyz bul salaǵa tıisti baqylaý ornatyp, ınvestıtsııa tartý múmkin emes, — dep tolyqtyrdy Prezıdent.
Buǵan deıin Qasym-Jomart Toqaev qomaqty qarjy bólinip jatqanyna qaramastan, agrarlyq ǵylymnyń qaıtarymy áli de tómen ekendigin aıtty.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.