Keıbir ınvestor tapqan tabysyn tek qaltaǵa basqandy jón kóredi - Prezıdent
ASTANA. KAZINFORM — Joǵary tehnologııamen sapaly qurysh quıý tásilin meńgerý kerek. Bul týraly Úkimettiń keńeıtilgen otyrysynda Prezıdent Qasym-Jomart Toqaev aıtty.
«Budan bólek, óndiristiń tehnıkalyq jaǵdaıyna da qatań baqylaý jasap otyrý qajet. Keıbir ınvestor tapqan tabysyn tek qaltaǵa basqandy jón kóredi. Eńbek qaýipsizdigi, ekologııa, óndiristi jańǵyrtý sııaqty mańyzdy máselelerge múlde nazar aýdarylmaıdy. Mundaı jaǵdaıǵa bárimiz kýá boldyq. Sondyqtan, meniń tapsyrmammen Qaraǵandy kombınaty ulttyq ınvestorǵa berildi. Oǵan berilýiniń basty sebebi – ınvestordyń kásiporyndy keshendi túrde jańǵyrtamyn degen nıetiniń bolýy», - dedi Qasym-Jomart Toqaev.
Prezıdenttiń aıtýynsha, óndiristiń jumysyn toqtatpaý jáne apatty jaǵdaıǵa jol bermeý úshin ken ornyn dereý qalpyna keltirý, óndiristik qaýipsizdikti kúsheıtý, materıaldyq-tehnıkalyq bazany jańartý kerek.
«Sondaı-aq, jańa óndirister ashyp, qosylǵan quny joǵary taýarlar shyǵarý úshin aýqymdy ınvestıtsııa tartqan jón. Joǵary tehnologııamen sapaly qurysh quıý tásilin meńgerý kerek. Mundaı ónimder kólik jasaý ónerkásibine jáne basqa da salalarǵa qajet. Aldaǵy bes jylda kásiporyn óndiris qarqynyn barynsha arttyryp, TMD-da kósh bastap turǵan metallýrgııa kombınattarynyń qataryna qaıta qosylýy kerek», - dedi Memleekt basshysy.
