Keıbir bilimdi azamattar óz oıyn jetkizetin orta taba almaı qalady — Murat Ábenov

ASTANA. KAZINFORM — Qoǵamda paıdaly, salmaqty ári jaýapty pikir aıtatyn azamattardyń oıy keıde tasada qalyp jatyr. Bul týraly Astanada Konstıtýtsııalyq reforma jónindegi komıssııanyń alǵashqy otyrysynda Parlament Májilisiniń depýtaty Murat Ábenov málim etti. 

— Eldiń ǵylymy men mádenıeti, ınnovatsııa men rýhanı qýaty oı erkindigi bar ortada ǵana qalyptasady. Tek osyndaı erkin shyǵarmashylyq keńistik bolsa, sol jerde ǵana jasampazdyq, tulǵalar ósip shyǵady. Ǵalym — jańa ıdeıa usynady, ınjener — tyń sheshim tabady, jazýshy men sýretker, ánshiler — qoǵamnyń rýhanı deńgeıin kóteredi. Sondyqtan shyǵarmashylyq erkindik — bolashaqqa salynatyn eń iri ınvestıtsııa. Memleket basshysy óz sózinde shyǵarmashylyq, ǵylymı jáne ınnovatsııalyq baǵytqa qoldaý kórsetýdi, jas talanttardyń eńbegin laıyqty baǵalaýdy únemi aıtyp keledi, — dedi Murat Ábenov.

Onyń aıtýynsha, qazir qoǵamda paıdaly, salmaqty ári jaýapty pikir aıtatyn azamattardyń oıy keıde tasada qalyp jatyr. 

— Kerisinshe, jeńil-jelpi, tekserilmeı áleýmettik jelide aıta salatyn oıdy jurt ilip áketedi. Sonda, keıbir bilimdi azamattar óz oıyn jetkizetin orta taba almaı qalady. Bul óz kezeginde qoǵamnyń ıntellektýaldy damýyna keri áser etetin qubylys. Aldaǵy ýaqytta osy azamattardyń oı-pikirin bılikke, qoǵamǵa jetkizetin arnaıy júıeler jasaýymyz kerek… Sondyqtan Konstıtýtsııalyq reforma aıasynda shyǵarmashylyq erkindikti tek jarııalap qana qoımaı, ony naqty qorǵaıtyn jáne qoldaıtyn normalardy bekitý qajet dep esepteımin. Birinshiden, Konstıtýtsııada sóz bostandyǵy men shyǵarmashylyq erkindiktiń mazmunyn naqtylap kórsetý kerek, — dedi depýtat.

Budan buryn habarlanǵandaı, Májilis depýtaty Únzıla Shapaq Konstıtýtsııa preambýlasyn jańartý tek redaktsııalyq túzetý emes ekenin aıtqan edi.