Keıbiri óz erkimen jumystan ketti – Jamaýbaev kazıno oınaǵan áriptesteri jaıly

ASTANA. QazAqparat – Premer-Mınıstrdiń orynbasary – Qarjy mınıstri Erulan Jamaýbaev vedomstvonyń kazınoda oıyn oınaǵan qyzmetkerlerine qatysty ishki tergeý jaıly aıtty, dep habarlaıdy QazAqparat tilshisi.

«Mundaı jaǵdaıda apparat basshysy mán-jaıdy anyqtaıdy. Ol kadr máselesine tikeleı jaýap beredi. Biz muny tek zańnama aıasynda qarastyramyz. Qatelespesem, 25 qyzmetkerge qatysty osyndaı aqparat boldy. Barlyǵyn qatysty aqparatty tekserip, tıisti shara qabyldadyq», - dedi ol Parlament palatalarynyń birlesken otyrysynan keıin BAQ ókilderiniń saýalyna oraı.

Onyń atap ótýinshe, kazınoda qumar oıyn oınaǵan Qarjy mınıstrliginiń birneshe qyzmetkeri jumystan shyqqan.

«Olardyń arasynda búginde bizde jumys istemeıtinder de bar. Óz erkimen jumystan ketti. Tártiptik jaýapkershilikke de tartylǵandar bar. Árbir qyzmetkerge qatysty qyzmettik tergeý jáne tekserý jumystaryn júrgizip, sodan keıin ǵana sheshim qabyldadyq», - dedi Erulan Jamaýbaev.

Eske salsaq, Almaty oblysynyń prokýratýrasy kazınolarǵa tekserý júrgizip, elimizdiń ártúrli óńirinen 300-den astam memlekettik qyzmetshiniń qumar oıyn oınaǵanyn anyqtady. Olar kazınoda 507 mln teńge utylǵan.