Keıbireýler memleket bıýdjetin túpsiz bóshke kóredi - Nursultan Nazarbaev

ASTANA. QazAqparat - Elbasy Nursultan Nazarbaev Qazaqstan halqyna bıylǵy Joldaýynda memleketten bólingen qarajat tıimdi ári maqsatty túrde jumsalýy tıistigin taǵy eskertti, dep habarlaıdy QazAqparat tilshisi.

«Túrkistan oblysynyń bir aýdanynda 600 oryndyq mektep 600 mln teńgege salynyp jatsa, týra sondaı mektep basqa jerde 1 mlrd 200 mln teńgege turǵyzylyp jatyr. Bul qalaı bolǵany? Úkimet keıde mektep qajeti joq jerge aqsha bóledi. Ákim nege ondaı talap qoıady? Al mektep jetpeı jatqan jerge aqsha bólinbeı jatady. Ulttyq ekonomıka mınıstrligi buǵan nege jol beredi? Sebebi, dál qurylys alańynda ter tókpegendikten, jaǵdaıdy jiti bile bermeıdi. Sen, (Ulttyq ekonomıka mınıstri Tımýr Súleımenov - avt.) qaı jerde úsh aýysymmen balalar oqyp jatqanyn, qaı jerde mekteptiń baryn bilýiń kerek! Men árbir mınıstr úshin jumys isteýim kerek pe?», - dedi Prezıdent.

Memleket basshysy Tımýr Súleımenovke mınıstr bolǵany úshin qarjyny únemdeýdi bilýi tıistigin eskertti.

«Al sizder únemdeýdiń ornyna shashpalyqqa jol beresizder. Keıde tańǵalamyn. Keıbireýler bıýdjettiń aqshasyna túpsiz bóshke sekildi qaraıdy. Ol jerden aqshany ala berýge bolatyn sekildi. Jyldyń sońynda ıgerilmegen qarajat mıllıardtap qalady. Qarasha-jeltoqsanda ol qarajatty ońdy-soldy jumsap, bazany bosatyp, kelesi jyly odan da kóp qarajat alǵysy keledi», - dedi Prezıdent.

Elbasy osyǵan baılanysty Esep komıteti baqylaýdy qataıtatynyn eskertti.

Aıta ketsek, QR Prezıdenti Nursultan Nazarbaev Aqordada Qazaqstan halqyna Joldaýyn jarııalady. Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.