Keıbir jergilikti organdar sýbsıdııa qarajatyn ysyrap etip, jelge ushyrǵan - AShM

ASTANA. QazAqparat - Keıbir jergilikti atqarýshy organdar aýyl sharýashylyǵy taýarlaryn óndirýshilerdi sýbsıdııalaý úshin bólingen qarajatty ysyrap etýmen aınalysqan.

Bul týraly búgin aýyl sharýashylyǵy mınıstrliginde ótken keńeste vedomstvonyń Іshki aýdıt jáne baqylaý departamentiniń dırektory Amanqos Shankıev málimdedi.

«Memleket aýyl sharýashylyǵy taýaryn óndirýshilerdi qoldaý úshin jyl saıyn qazynadan qomaqty qarajat bólip keledi. Al keıbir jergilikti atqarýshy organdar atalǵan qarajatty ysyrap etýmen aınalysýda», -dedi A.Shankıev.

Onyń aıtýynsha, prokýratýra jaqynda aýyl sharýashylyǵy taýaryn óndirýshilerdi qoldaýǵa baǵyttalǵan qarajatty bólýdiń zańdylyǵyna tekserý júrgizgen. Sonyń nátıjelerine sáıkes, birqatar kemshilikter anyqtalyp otyr. Atap aıtqanda, qarajatty bólýdegi zańsyzdyqtardyń basym bóligi Almaty oblysynda - 2 228, Jambyl oblysynda - 662, Aqtóbe oblysynda - 432, Qyzylorda oblysynda - 276, Atyraý oblysynda - 168, Pavlodar oblysynda 118 fakti boıynsha anyqtalǵan. Bul rette ákimdiktegi jaýapty tulǵalardyń jáne vedomstvoaralyq komıssııa músheleriniń salǵyrttyǵy saldarynan qajetti qujattardyń joqtyǵyna qaramastan sýbsıdııalaý úshin qarajat úılestirilip otyrǵan. Bunymen qosa, kásipkerlerden zańnamada kórsetilmegen qujattardy talap etý faktileri de oryn alyp otyr.

«Tekserý nátıjeleri boıynsha zańdylyqtyń buzylýyna qatysty 4 153 fakti anyqtaldy. Negizsiz bólingen sýbsıdııa somasy 663 mıllıon teńgeden asyp otyr. Sonyń tek 10,8 mln. teńgesi ǵana memelketke qaıtaryldy», - dedi departament basshysy.