Keıbir zańnamalyq aktilerge terrorızmge qarsy is-qımyl máseleleri boıynsha ózgerister engizý týraly zań jobasyn birinshi oqylymǵa shyǵarý usynyldy - Májilis bıýrosy
ASTANA. 9 qarasha. QazAqparat - Búgin Májilis Tóraǵasy Nurlan Nyǵmatýlınniń jetekshiligimen ótken Palata Bıýrosynyń otyrysynda depýtattar aldaǵy ótetin jalpy otyrystyń kún tártibine engiziletin zań jobalaryn qarastyrdy.
Bul týraly Májilistiń baspasóz qyzmeti habarlady.
Halyqaralyq ister, qorǵanys jáne qaýipsizdik komıtetinen «Qazaqstan Respýblıkasynyń keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasyn birinshi oqylymǵa shyǵarý usynyldy.
Zańnama jáne sot-quqyqtyq reforma komıteti depýtattardyń talqylaýyna «Derbes derekter týraly» Zań jobasyn ilespe túzetýlerimen birinshi oqylymǵa shyǵaratyn boldy.
Al, «Qazaqstan Respýblıkasynyń keıbir zańnamalyq aktilerine áleýmettik mańyzy bar memlekettik qyzmetter máseleleri boıynsha ózgerister men tolyqtyrýlar engizý týraly» Zań jobasyn birinshi oqylymǵa parlamentshiler qaraýyna Ekonomıkalyq reforma jáne óńirlik damý komıteti shyǵarady.
Áleýmettik-mádenı damý komıteti «Memlekettik bilim berý jınaqtaý júıesi týraly» Zań jobasyn ilespe túzetýlerimen birinshi oqylymǵa usynyp otyr.
Sonymen birge kúntártibine «Qazaqstan Respýblıkasynyń Úkimeti men Ázerbaıjan Respýblıkasynyń Úkimeti arasyndaǵy dıplomatııalyq ókildikterdiń ǵımarattaryn salý úshin jer ýchaskelerin ózara berý týraly kelisimdi ratıfıkatsııalaý týraly» Zań jobasy Halyqaralyq ister, qorǵanys jáne qaýipsizdik komıtetinen qosylyp otyr.
Sondaı-aq, Palata aldynda «Qazaqstan Respýblıkasynyń Memlekettik shekarasy týraly» jáne «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Memlekettik shekarasy jáne Qazaqstan Respýblıkasy Ulttyq qaýipsizdik komıteti Shekara qyzmetiniń máseleleri boıynsha ózgerister men tolyqtyrýlar engizý týraly» Zań jobalary boıynsha Halyqaralyq ister, qorǵanys jáne qaýipsizdik komıtetine qorytyndy ázirleý mezgilin naqtylaý máselesi tur.
Bıýro búgingi otyrysynda «Halyqty turǵyn úımen qamtamasyz etýdiń jaı-kúıi jáne perspektıvalary týraly» taqyrybynda parlamenttik tyńdaý ótkizý týraly jáne depýtattardyń saılaýshylarmen kezdesýi úshin óńirlerge saparǵa shyǵýy týraly máseleler de qaraldy.
