Keıbir sımptomdar baıqalsa, birden birneshe dári ishý zııan – pýlmonolog keńesi
NUR-SULTAN. QazAqparat – 17 mamyr – pýlmonologtar kúni. Atalǵan sala mamandarynyń kásibı merekesi 1997 jyldan beri álemniń kóptegen elderinde atalyp keledi. Ózderiniń kásibı merkesine oraı, Densaýlyq saqtaýdy damytý respýblıkalyq ortalyǵynyń mamany, pýlmonolog Aıjan Ernazarova koronavırýstyń aldyn-alý boıynsha buqaraǵa qajetti keńestermen bólisti, dep habarlaıdy QazAqparat tilshisi.
«Koronavırýs ınfektsııasy taralǵan alǵashqy aılarda dári-dármekti durys taǵaıyndamaý jaǵdaılary kóp tirkeldi. Bul ınfektsııa tek bir KT (kompıýterlik tomografııa) nátıjesine qarap qoıylatyn dıagnoz emes. Máselen KT arqyly ókpede ózgeristerdiń bary anyqtalyp, biraq sımptomdary asa mazalamasa nemese tek dene qyzýy bolsa, bul antıbıotıkti úıip-tógip qabyldaý kerek degendi bildirmeıdi. Bizde adam sál entikse boldy, onsyz da qınalyp jatqan organızmdi 3-4 dárimen odan saıyn álsiretip jiberemiz. Sondyqtan sheshim kompıýterlik tomografııa jáne qan taldamalarynyń ortaq nátıjesinen keıin qabyldanýy tıis. Esterińizde bolsyn, kez kelgen preparat baýyrdyń jáne ózge de ishki aǵzanynyń qalypty jumysyn buzady», - dep atap ótti Aıjan Ernazarova.
Pýlmonologtyń aıtýynsha, búginde pýlmonologııada ókpe men bronh aýrýlaryn erte kezeńderde anyqtaýǵa múmkindik beretin ártúrli dıagnostıkalyq ádister qoldanylady. Sondyqtan aýrýdy asqyndyrmaı, der kezinde dáriger kómegine júginý qajet.
«Búkil aǵzany ottegimen qamtamasyz etetin ókpeniń jumysy óte mańyzdy. Ókpede nerv ushtary joq. Sondyqtan bul organ sońyna deıin syr bermeıdi. Sondaı-aq basqa múshelerge qaraǵanda ókpege transplantatsııa jasaý óte qıyn. Óıtkeni, ony aǵza kótere almaýy múmkin.
Sondyqtan saqtyq sharalaryn únemi qaperde ustaǵan abzal. Tynys alý joldaryn saqtaý úshin arnaıy jattyǵýlardy jasaǵan paıdaly. Koronavırýs bizge salaýatty ómir saltyn ustanýdyń qanshalyqty mańyzdy ekendigin uqtyrdy dep oılaımyn», - dedi pýlmonolog-maman.
Budan bólek Aıjan Ernazarova taza aýada serýendeý, zııandy ádetterden aýlaq bolý, kóbirek qımyldaý, durys tamaqtaný sııaqty qarapaıym qaǵıdalardy ustaný mańyzdy ekenin atap ótti. Onyń pikirinshe, jalqaýlyqtan arylyp, osy erejelerdi eskersek, ókpe aýrýlarynyń aldyn-alýǵa bolady.
