Keıbir saqtandyrý kompanııalary aǵymdaǵy jylǵy egindi saqtandyrýdan bas tartýda
ASTANA. Shildeniń 1-i. QazAqparat /Marlan Jıembaı/ - Keıbir saqtandyrý kompanııalary aǵymdaǵy jylǵy egindi saqtandyrýdan bas tartýda. Bul jaıynda búgin Aýyl sharýashylyǵy mınıstrliginde ótken baspasóz máslıhaty barysynda belgili boldy.
Búgingi kúni egistik alqaptarynda jumystardyń tolyǵymen aıaqtalǵanyn atap ótken QR Aýyl sharýashylyǵy mınıstrligi AÓK damytýdy taldaý jáne strategııalyq josparlaý departamentiniń bas sarapshysy Talǵat Jubaev: «endigi aýyl sharýashylyǵy ónimderin óndirýshilerge keregi -óziniń egis alqaptaryn tolyǵymen saqtandyrý. Bul boıynsha qazir jumystar júrgizilip jatyr. Degenmen, keıbir jaǵdaılarda saqtandyrý taraptarynan qarsylyq bildirý, saqtandyrý kelisimsharttaryn jasamaý jaǵdaılary kezdesip otyr», deıdi.
Jergilikti ákimdikterdiń málimetterine súıenip aıtqan onyń sózine qaraǵanda, aýa raıynyń qurǵaq bolýyna baılanysty saqtandyrý kompanııalarynyń ósimdik sharýashylyǵyndaǵy mindetti saqtandyrý kelisimsharttaryn jasaýdan bas tartý faktileri belgili bolǵan.
Bul oraıda mınıstrlik ókili «Ósimdik sharýashylyǵyndaǵy mindetti saqtandyrý týraly» QR Zańyna jáne ákimshilik kodekske sáıkes lıtsenzııasy bar saqtandyrý kompanııalarynyń saqtandyrý kelisim sharttaryn jasamaýǵa eshqandaı quqyqtary joq ekendigin alǵa tartady. Sondyqtan da tek qana bizdiń taýar óndirýshiler olarǵa rásimdelgen, arnaıy shartpen bekitilgen ózderiniń aryzdaryn mindetti túrde jazbasha berýi kerek. Eger ol jazbasha bergen aryzyna qarsylyq bildirilse, onda ol áreket zańsyz bolyp eseptelinedi de, bul jóninde Qarjy naryǵyn jáne qarjy uıymdaryn retteý men qadaǵalaý agenttigine ózderiniń aryzdaryn bere alady. Sol aryzdary, faktileri boıynsha atalǵan agenttik ózderiniń tarapynan zańǵa sáıkes shara qoldanady», deıdi T.Jubaev.
Onyń atap ótýinshe, qazirgi ýaqytta mindetti saqtandyrý aýyl sharýashylyǵynda eki baǵytta, atap aıtqanda saqtandyrýdyń osy túrine lıtsenzııasy bar kompanııalar jáne aýyl sharýashylyǵy taýarlaryn óndirýshilerdiń qatysýymen ózara saqtandyrý qoǵamdary arqyly júzege asyrylýda.
Baspasóz máslıhatyna qatysqan atalǵan departamenttiń dırektory Núrken Shárbıevtiń sózine qaraǵanda, mınıstrlik oblys ákimdikterine ár aımaqta ekiden artyq emes ózara saqtandyrý qoǵamdaryn qurýǵa usynys jasaǵan. «Osy usynysty qabyldaǵan oblystar aýyl sharýashylyǵyn mindetti saqtandyrý boıynsha eshqandaı qıyndyq kórip otyrǵan joq», deıdi ol.
Al osy usynysty qabyldamaǵan Batys Qazaqstan, Qaraǵandy, Pavlodar oblystarynda ózara saqtandyrý qoǵamdary oıdaǵydaı damymaı sonyń saldarynan qıynshylyqtarǵa tap bolyp otyr.
