Keıbir pánder orta mektepte aǵylshyn tilinde oqylatyn bolady - B.Jumaǵulov
ASTANA. 9 shilde. QazAqparat - 4-5 jyldan keıin keıbir pánder orta mektepte aǵylshyn tilinde oqylatyn bolady.
Bul týraly búgin QR Bilim jáne ǵylym mınıstri Baqytjan Jumaǵulov bilim berýdegi kóptildilikti damytý máselelerine arnalǵan jıynda aıtty.
Aldaǵy jyldyń qyrkúıek aıynan bastap Qazaqstanda birinshi synyp baǵdarlamasyna aǵylshyn tili engiziletindigin atap ótken ol: «Endi 4-5 jyldan keıin biz keıbir pánderdi, máselen bıologııa, hımııa, fızıkany mektepterde aǵylshyn tilinde oqytatyn bolamyz. Oǵan qazirden bastap daıyndyq jasamasaq, ýaqyt syrǵyp óte shyǵady. Jalpy, 2020 jylǵa qaraı keıbir pánderdi aǵylshyn tiline aýystyramyz degen oıymyz bar»,- dedi.
Bul rette mınıstr jurtshylyq arasynda túsinbeýshilik oryn almaýy qajettigin basa aıtty. «Qazaq tilin biz barlyq mektepterde kúsheıtip, aptasyna 20 saǵatqa jetkizdik. Ony ózderińiz de jaqsy bilesizder. Qazaq tilin árbir qazaq bilýi kerek. Ekinshiden, 2020 jyly mektep bitirgen árbir bala qazaq tilinde sóıleıtin bolýy tıis. Bul Elbasynyń tikeleı tapsyrmasy», - dedi B.Jumaǵulov.
Onyń atap ótýinshe, bul baǵyttaǵy jumystar jolǵa qoıylyp, atqarylý ústinde. Sonymen qatar orys tilin bilý de mańyzdy. Óıtkeni tóńiregimizde osy tilde sóıleıtin 200 mln-nan astam halyq bar. «Jalpy, álem deńgeıinde ǵylym, bilim, ınnovatsııa damyp jatyr. Onyń bári aǵylshyn tilinde», - dedi ol.
