Keıbir organdardyń ataq alý jáne nysandy kıim kıip júrý quqyqtary 2012 jylǵy 1 qańtardan bastap joıylady
ASTANA. 24 qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «QR keıbir zańnamalyq aktilerine synyptyq shen, áskerı jáne arnaýly ataqtar berý,
áskerı qyzmetshilerdiń jáne ózge de memlekettik organdar qyzmetkerleriniń nysandy kıim kıip júrý quqyǵy máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy.
Zań jobasyn ázirleýshiler «Demokratııalyq úderisterdi damytý eldi áskerılendirý deńgeıin tómendetýdi boljaıdy» degen tujyrym jasaı kelip, áskerı jáne arnaýly ataqtar berýdi, qyzmetkerleriniń pogony bar nysandy kıim kııýge quqyǵy bar memlekettik organdar sanyn qysqartýdy maqsat etip otyrǵandaryn alǵa tartady. Zań jobasynda áskerı jáne arnaýly ataqtardy, synyptyq shenderi, pogony bar nysandy kıim kıip júrý quqyǵyn tek Qazaqstan Respýblıkasy Qarýly Kúshteri bólimsheleriniń, Ulttyq qaýipsizdik komıtetiniń, Respýblıkalyq ulannyń, Prezıdenttiń Kúzet qyzmetiniń, Іshki ister mınıstrliginiń, Ekonomıkalyq qylmysqa jáne sybaılas jemqorlyqqa qarsy kúres agenttiginiń (qarjy polıtsııasy), Tótenshe jaǵdaılar mınıstrliginiń, prokýratýra organdarynyń, Ádilet mınıstrliginiń qyzmetkerleri úshin ǵana qaldyrý jóninde túzetý engizilmekshi. Nysandy kıim kıetin ózge salanyń qyzmetkerleri pogon taqpaıtyn bolady. Olardyń laýazym ataqtary synyptyq shen men biliktilik deńgeıine aýystyrylady.
Budan bólek, ataq alý jáne nysandy kıim kıip júrý quqyqtary 2012 jylǵy 1 qańtardan bastap joıylatyn adamdardy áleýmettik qorǵaý máselelerin sheshýge de baǵyttalyp otyr.
Sonymen qatar, sot prıstavtarynyń, aýyl sharýashylyǵy mınıstrligi men Kólik jáne kommýnıkatsııa mınıstrligi júıesi qyzmetkerleriniń jekelegen sanattarynyń pogonsyz nysandy kıim kıip júrý quqyǵy saqtalady.
Májilis maquldaǵan zań jobasy Parlament Senatyna jiberiledi.
