Keıbir óńirlerde kómirdi jetkizý jospary oryndalmaǵan - Jeńis Qasymbek
ASTANA. QazAqparat - Búgin Úkimet otyrysynda QR Investıtsııalar jáne damý mınıstri Jeńis Qasymbek el óńirlerin kómirmen qamtamasyz etý barysy jaıynda baıandady, dep habarlaıdy QazAqparat.
«Bıylǵy jyldyń 7 aıynda 60 mln tonna kómir óndirildi, bul ótken jyldyń sáıkes kezeńimen salystyrǵanda 4 paıyzǵa artyq. Sizdiń 2018 jylǵy 7 tamyzdaǵy tapsyrmańyzǵa sáıkes, jylý berý maýsymyn turaqty ótkizý maqsatynda Investıtsııalar jáne damý mınıstrligi men Energetıka mınıstrliginiń Shtab qurý týraly birlesken buıryǵy shyqty. Shtab 2018-2019 jyldar kezeńindegi jylý berý maýysymyna daıyndyq barysy men onyń turaqty ótýin baqylaıdy. Atap aıtqanda, kommýnaldyq-turmystyq sektordyń, halyq pen elektr stansalarynyń kómirmen qamtamasyz etilýin qadaǵalaıdy. 2018-2019 jyldar kezeńinde turǵyndarǵa, kommýnaldyq-turmystyq kásiporyndarǵa jáne bıýdjettik uıymdarǵa respýblıka boıynsha kómir jetkizýdiń jalpy suranysy aıqyndalǵan. Onyń kólemi 9,8 mln tonnany quraıdy, sonyń 2,3 mln tonnasy kommýnaldyq-turmystyq kásiporyndar men bıýdjettik uıymdarǵa, al 7,5 mln tonnasy turǵyndardyń tutynýyna josparlanǵan», - dep toqtaldy J. Qasymbek Úkimet basshysy Baqytjan Saǵyntaevqa qarata aıtqan sózinde.
Belgili bolǵandaı, Energetıka mınıstrligi jergilikti atqarýshy organdardyń tapsyrystaryna sáıkes, kommýnaldyq-turmystyq jáne turǵyndar qajettiligine arnalǵan 2018-2019 jyldar aralyǵyndaǵy kezeńge suranys josparyn jasady.
«17 tamyzdaǵy ákimdikterdiń bergen aqparaty boıynsha keıbir óńirlerde kómirdi jetkizý josparlary oryndalmaǵanyn kórip otyrmyz. Mysaly, Jambyl oblysynda jylý berý maýsymynan tamyz aıyna deıin jospar boıynsha 71 myń tonna kómir jetkizilýi kerek edi, is júzinde 24,7 myń tonna ǵana jetkizilgen. Jospar 34,8% ǵana oryndalǵan. Almaty qalasynda jospar boıynsha 23 myń tonna, is júzinde 14 myń tonna jetkizildi. Jospar 61%-ǵa oryndalǵan», - dep naqtylady mınıstr.
Degenmen de, josparly kórsetkishterdi asyra oryndaǵan óńirler de bar. Bul turǵyda Soltústik Qazaqstan, Aqmola, Pavlodar oblystarynda jaqsy kórsetkishter baıqaldy.
Bıyl jylý berý maýsymyna daıyndyq bastalǵaly (1 mamyrdan 16 tamyzǵa deıin) temirjol kóligimen 18 mln 621,2 myń tonna kómir tasymaldandy. Bul 2017 jyldyń sáıkes kezeńimen salystyrǵanda 753,9 myń tonnaǵa (4,2%) artyq.
Tasymaldanǵan 18,6 mln tonna kómirdiń 2,8 mln tonnasy kommýnaldyq-turmystyq qajettilikke tıesili. Ol 2017 jyldyń sáıkes kezeńimen salystyrǵanda 600 myń tonnaǵa artyq.
Búgingi kúni tasymaldaýǵa «Qazaqstan temir joly» aktsıonerlik qoǵamy parkiniń shamamen 9 myń vagony jumyldyrylǵan. Tasymaldaý kólemi ulǵaıyp, qosymsha vagon kerek bolsa, basqa temirjol ákimshilikterinen 1 000 vagon tartylmaq.
