Keıbir óńirlerde qoǵamdyq oryndardyń jumysy toqtatylady – mınıstrlik

NUR-SULTAN. QazAqparat - Óńirlerdiń 50 myńnan astam halqy bar eldi mekenderinde qoǵamdyq oryndardyń jumysy toqtalady. Bul týraly Úkimet otyrysynda QR Densaýlyq saqtaý mınıstriniń mindetin atqarýshy Lázzat Aqtaeva aıtty, dep habarlaıdy QazAqparat tilshisi.

«KVI syrqattanýshylyǵynyń ósýin eskere otyryp, keshe, 18 maýsymdaǵy VAK sheshimimen Nur-Sultan jáne Almaty, Qaraǵandy, Shymkent, Pavlodar, Ekibastuz qalalarynda aldaǵy demalys kúnderi karantındi kúsheıtýdiń qosymsha sharalary qabyldandy. Atap aıtqanda 20-21 maýsymda: saýda-oıyn-saýyq ortalyqtarynyń, saýda úıleriniń, saýda jelileriniń, jabyq azyq-túlik jáne azyq-túlik emes bazarlardyń qyzmeti toqtatylady; qoǵamdyq tamaqtaný obektileriniń jumysy áleýmettik qashyqtyqty saqtaı otyryp, ashyq aýada kóshe formatynda ǵana ruqsat etiledi; qoǵamdyq kóliktiń jumysy shekteledi; fıtnes ortalyqtarynyń qyzmeti toqtatylady; 65 jastan asqan adamdardyń kóshege shyǵýy shekteledi», - dedi ol.

Sonymen qatar, onyń aıtýynsha, joǵaryda atalǵan qalalarǵa jaqyn ornalasqan týrıstik aımaqtarǵa kirý jabylady.

Sondaı-aq, óńirlerdiń 50 myńnan astam halqy bar eldi mekenderinde: qoǵamdyq oryndardyń jumysy toqtalady; týrıstik aımaqtarda turatyn adamdarǵa áleýmettik qashyqtyqty saqtaý usynylady; 65 jastan asqan adamdardyń kóshege shyǵýy shekteledi«, - dedi Lázzat Aqtaeva.