Keıbir nysandardy qarjylandyrý keıinge shegeriledi - Memleket basshysy
ASTANA. 11 qazan. QazAqparat - Keıbir nysandardy qarjylandyrý birshama ýaqytqa keıinge shegeriledi. Búgin Aqordada ótip jatqan Úkimettiń keńeıtilgen otyrysynda Memleket basshysy Nursultan Nazarbaev osylaı málim etti.
«Biz memlekettik baǵdarlamalar qabyldadyq. Salalyq baǵdarlamalar da bar. Biz halyqqa usynylǵannyń barlyǵy da resýrstarmen tolyq qamtamasyz etiledi ári ol oryndalady deımiz. Barlyq baǵdarlamalar mańyzdy emes dep aıtpaımyn. Olar kerek. Degenmen, memlekettiń múmkinshiligi de bar. Óıtkeni, permamentti daǵdarys jaǵdaıynda bizderge resýrstardy el úshin qıyn-qystaý kezeńde saqtaý qajet bolady»,-dedi N. Nazarbaev.
Sondyqtan, Memleket basshysynyń atap ótýinshe, keıbir nysandardy qarjylandyrý shekteletin bolady. Bul konıýktýranyń ózgerýine baılanysty bıýdjet túsimderiniń ózgeriske ushyraýymen de ushtasyp jatyr. «Sondyqtan osyǵan negizdele otyryp, shydaı tura alatyn keıbir nysandardy qarjylandyrýdy barynsha keıingi merzimge qaldyramyz»,-dedi QR Prezıdenti.
