Keıbir naýqastarda koronavırýstan keıin qant dıabeti paıda boldy - dáriger
NUR-SULTAN. QazAqparat – «Ulttyq ǵylymı kardıohırýrgııa ortalyǵy» AQ basqarmasy tóraǵasynyń mindetin atqarýshy Mahabbat Bekbosynova keıbir naýqastarda koronavırýs ınfektsııasynan keıin qant dıabeti paıda bolǵanyn aıtty, dep habarlaıdy QazAqparat tilshisi.
«Shyn máninde bul problema barsha álemniń ǵalymdaryn alańdatyp otyr. Osy oraıda koronavırýsqa deıin bolǵan qant dıabetin aıtyp turmyn. Koronavırýstan keıin qant dıabetin qalaı emdeý kerek? Qant dıabeti alǵash ret paıda bolǵan patsıentter toby bar, olarda koronavırýs ınfektsııasyna deıin bul aýrýǵa shaldyǵýǵa negiz bolmaǵan edi. Qazirgi kezde halyqaralyq regıstr bar, oǵan koronavırýstan keıin alǵash qant dıabetimen aýyrǵan patsıentterdiń barlyǵy engiziledi. Bul sharalar osy dıabettiń patogenezin túsiný úshin jáne ony emdeý joldaryn aıqyndaý turǵysynda qajet», - dedi dáriger.
Onyń sózine qaraǵanda, koronavırýstan nevrologııalyq saldary da tirkelýde.
«Bul óz kezeginde koronavırýspen aýyrǵan aýdamdardy qatty alańdatyp otyr. Sondyqtan bul baǵyttaǵy em-dom sharalary zerttelýde», - dedi Mahabbat Bekbosynova.
Budan buryn habarlanǵandaı, M. Bekbosynova koronavırýsqa qarsy dárilik preparattardy tek dárigerler taǵaıyndaýy kerektigin aıtty.
«Dárigerler efırde qandaı da bir preparattardyń ataýyn jarııalaǵanǵa qarsymyn. Sebebi muny halyq durys qabyldamaıtyn jaǵdaılar kezdesedi. Bizdiń suhbattarymyzdy tyńdap alyp, adamdar dárihanaǵa baryp, preparattardy satyp alady. Jalpy, dárilik preparattar tek retsept boıynsha satylýy kerek», - dedi ol.
