Keıbir ken oryndarynda munaı óndirýdi qysqartý aýyrtpalyqsyz atqaryldy – Nurlan Noǵaev

NUR-SULTAN. QazAqparat – OPEK+ kelisimine qatysý suranys pen usynys teńgerimin qalpyna keltirýge jáne munaı baǵasyn qalpyna keltirýge baǵyttalǵan. Bul týraly QR Energetıka mınıstri Nurlan Noǵaev halyq aldynda esep berý kezdesýinde aıtty, dep habarlaıdy QazAqparat tilshisi.

«Eger biz munaı óndirýdi qysqartpaǵan jaǵdaıda, 2020 jyldyń ekinshi toqsanynda munaı saqtaý oryndarynyń tolyp ketýine, keıbir ken oryndarynda munaı óndirýdiń toqtap qalýyna ákelýi múmkin edi. Mámilege qatysýdyń arqasynda naryqtyń barlyq qatysýshylary munaı óndirýdiń baqylanýyna jáne birtindep tómendeýine qol jetkizdi. Biz keıbir ken oryndarynda óndirýdi tolyq toqtatpaı, barynsha aýyrtpalyqsyz qysqartý júrgizdik», - deıdi QR Energetıka mınıstri Nurlan Noǵaev

Onyń aıtýynsha, Qazaqstandyq munaı óndeý zaýyttaryn jabdyqtaý nátıjesinde búgingi tańda ishki naryqtyń qajettiligi tolyǵymen otandyq ónimmen qamtamasyz etilýde.

«2020 jyldyń mamyr-maýsym aılarynda OPEK+ kelisimine qatysýshy elder munaı óndirýdi táýligine 9,7 mln barrelge qysqartýdy josparlap otyr. Qazaqstan táýligine 390 myń barrelge óndirýdi azaıtý mindetin óz moınyna aldy. Qazaqstandaǵy ortasha táýliktik munaı óndirý (kondensatsyz) 25 mamyrdaǵy jaǵdaı boıynsha 177,8 myń tonna munaıdy quraıdy, bul OPEK+mámilesiniń mindettemelerin oryndaǵanyn kórsetedi», - deıdi ol.