Keıbir iri ken oryndarynda jalaqy ósti – Aqtóbe oblysy ákiminiń birinshi orynbasary

AQTÓBE. QazAqparat – Óńirde birqatar sala jumysshylarynyń talaby oryndalyp, jalaqysy ósti. Bul týraly oblys ákiminiń birinshi orynbasary Rýslan Hambarov óńirlik kommýnıkatsııalar qyzmetinde ótken tikeleı efır kezinde aıtty, dep habarlaıdy QazAqparat tilshisi.

Aqtóbe oblysynda iri ken oryndarynyń jumysshylary óz talabyn qoıdy. Qazirgi kezde birqatar óndiris oryndarynda jumysshylar jalaqasyn kóterý máselesi qarastyrylyp jatyr.

«Óndiris salasy jumysshylarynyń basty talaptarynyń biri jalaqyny kóterý boldy. Bul rette oblys ákimdigi turaqty sharalardy qabyldap jatyr. Jalpy bıyl 1 qańtardan bastap óndiris salasyndaǵy 24 myń adamǵa jalaqy ortasha eseppen 25% ósirildi. «Aqtóbe mys kompanııasy», «Kopper Teknolodjı», «Kazgeorýd» kásiporyndary (2 000 adam) 20%-dan 50%-ǵa, «SNPS-Aqtóbemunaıgaz» AQ (6 100 adam) 25 %-ǵa deıin kóterdi. «Kazhrom» TUK» AQ (Aqtóbe ferroqorytpa zaýyty jáne Dóń ken baıytý kombınatyndaǵy 12 000 adam) 10%-dan 35%-ǵa deıin kóterdi. Qalǵan kásiporyndar boıynsha basshylarymen kelissózder júrgizilýde. Sonymen qatar, óńirdi damytý maqsatynda, Aqtóbe oblysynyń 2022-2025 jyldarǵa arnalǵan áleýmettik-ekonomıkalyq damýynyń keshendi jospary ázirlenip jatyr. Atalǵan josparǵa jergilikti halyq úshin mańyzy zor jobalar engiziledi», - dedi oblys ákiminiń birinshi orynbasary Rýslan Hambarov.

Buǵan deıin habarlaǵanymyzdaı, Aqtóbede jaǵdaı turaqty. Ákimdikten basqa ǵımarat búlingen joq.