Keıbir estrada «juldyzshalaryna» teatr qoıylymdaryna bólinetin qarjydan áldeqaıda kóp qalamaqy beriledi - Mádenıet mınıstri

ASTANA. QazAqparat - Teatrlardyń jańa qoıylymdaryna bólinetin qarjy mardymsyz. Bul týraly búgin QR Úkimetiniń selektorlyq rejimdegi otyrysynda QR Mádenıet jáne aqparat mınıstri Muhtar Qul-Muhammed aıtty.

«Repertýar týraly áńgime qozǵaǵanda jańa qoıylymdarǵa bólinetin qarajattyń jetimsizdigi týraly aıtpaý múmkin emes. Respýblıkamyzdaǵy teatrlarda bir spektakldi sahnalaýǵa 2 mln. teńgeden joǵary qarajat jumsalady. Bul Reseı teatrlarymen salystyrǵanda 10-15 ese az», - dedi mınıstr.

Onyń atap ótýinshe, oblystyq teatrlardaǵy bir qoıylymǵa bólinetin qarjy respýblıkalyq deńgeıden 10 esege tómen. Máselen, Arqalyq qazaq drama teatrynda 6 qoıylymǵa 2,6 mln. teńge, Jetisaı teatrynda 4 qoıylymǵa 1,1 mln. teńge, ıaǵnı ár spektaklge nebári 275 myń teńge, Pavlodar oblystyq qazaq teatrynda 6 qoıylymǵa 1,4 mln. teńge, ıaǵnı ár spektaklge 293 myń teńge ǵana qarajat bólingen.

«Aıtyńyzdarshy, ondaǵan ártis qatysyp, olarǵa arnaıy kostıým tigiletin, birneshe ret kórinis aýysyp, kóptegen arnaıy dekoratsııalar, rekvızıtter jasalatyn spektakldi nebári 2000 dollarǵa jeter-jetpes qarajatqa sahnalaýǵa bola ma? Árıne bolmaıdy. Men bul suraqtarǵa jaýapty aımaqtyq teatrlardyń bıýdjetin qarastyratyn oblys ákimderiniń qarjy, ekonomıka jónindegi orynbasarlaryna baǵyttaǵym keledi. Tipti, sol sheneýnikterdiń ara-tura bolatyn toı-tomalaǵyna qatysatyn keıbir estrada «juldyzshalaryna» budan áldeqaıda kóp qalamaqy beriletinin olar jaqsy biledi. Endeshe, olar búgingi aıtylǵan synnan tıisti qorytyndy shyǵarady dep senemin», - dedi M.Qul-Muhammed.