Keıbir dinı aǵymdar Qazaqstan tarıhynyń balama nusqalaryn qoldan jasap, taratyp júr - Q. Lama Sharıf
ASTANA. 19 naýryz. QazAqparat - Bir býyn aýysqan soń, elimizdiń dinı ahýaly qatty ózgerýi múmkin. Bul jóninde búgin Astanada ótken «Qazaqstandaǵy din bostandyǵy» taqyrybyndaǵy halyqaralyq konferentsııada QR Din isteri agenttiginiń tóraǵasy Qaırat Lama Sharıf aıtty.
«Sońǵy kezderi ómirde joly bolmaǵandarmen qatar belsendi jastardyń ózi dástúrli emes dinı aǵymdarǵa kóptep tartylýda. Budan túıerimiz, bir urpaq aýysqan kezde elimizdiń dinı ahýaly adam tanymastaı ózgeredi degen sóz. Sol ózgeristerdiń Qazaqstannyń múddesine emes, kerisinshe bizdiń tabıǵı baılyǵymyzǵa kóz salyp otyrǵan basqa elderdiń oń jambasyna keletini de jasyryn emes.
Qazirdiń ózinde Qazaqstanda da, keıbir shekaralas elderde de óz aǵymdaryn basqalarǵa tyqpalaýmen aınalysatyn toptar eldiń negizgi ultynyń tarıhyn burmalap, óz «dinderin» dástúrli etip kórsetýge baryn salyp baǵýda», - dedi Q. Lama Sharıf.
Onyń aıtýynsha, mundaı manıpýlıatsııa halyqtyń tarıhı jadyna azdy-kópti bolsa da, áser etýi múmkin.
