Keıbir balalar sóıleı almaıtyn zamandastarynyń bar ekenin bilmeıdi - ádisker

Aqtóbe oblystyq estý qabileti nashar balalarǵa arnalǵan mektep-ınternat-kolledjinde qazir 100-den astam bala tárbıelenip jatyr. Báriniń qulaǵy estimeıdi, keıbiri dybystardy baıaý ajyratady.

Buǵan deıin Aqtóbe, Mańǵystaý, Atyraý, Batys Qazaqstan, Qyzylorda oblystarynyń balalaryn qamtyǵan mektepte tek Aqtóbe oblysynyń tárbıelenýshileri qalǵan. Ózge aımaqtar qajetti mektep-ınternatty jergilikti jerde ashyp aldy. Kúni búginge deıin bul mektep-ınternatqa kelgen balalardyń bári oqshaý tárbıelendi. Olar syrtqa shyqpady, qoǵammen aralaspady. Balalardyń jańa ádispen tárbıelenip jatqanyna sanaýly jyldar ótti. Sońǵy kezderi olar saýda oryndaryna baryp, fleshmob uıymdastyryp júr. Osy jolmen balalar ózderiniń bar ekenin, eshkimnen kem túspeıtinin dáleldemek. Al keıde zamandastarymen qatar otyryp, áńgimelesedi.

«Qalypty adamdar kúndelikti kúıbeń tirshilikte «qıyndyq týdy» dep qarapaıym kedergilerge renish bildiredi. Estý múmkindigi shekteýli balalar aýyzsha sóıleý tilin bilmegen soń jıi qınalady. Sondyqtan biz olardy qalypty adamdarmen kezdestirip, qoǵamǵa beıimdelýdi qolǵa aldyq. Alǵashqy kezdesýlerde balalar tosyrqady. Keıbir balalar kezdesý kezinde sóıleı almaıtyn zamandastarynyń bar ekenin birinshi ret bilip jatady. Olar sóıleı almasa da asa qabiletti ekenin kórip, tańqalady, ózderine jaqyn tartady. Bul da jetistik»,- dedi oblystyq estý qabileti buzylǵan balalar mektep-ınternat- kolledjiniń ádiskeri Indıra Qobylash.

Múmkindigi shekteýli balalar sýret salýǵa, bı ónerine beıim. Sporttyq jarystarǵa jıi qatysyp, júldeli oralady. «Juldyzaı» festıvalinde baq synaıdy. Ym-ıshara tilimen án aıtady. Olar jarysta jaqsy nátıjege qol jetkizip júr.

«Balalardy qoǵamǵa beıimdeý úshin oblystyq kitaphana men mektep ákimshiligi barasynda kelisim jasaldy. Qazir mádenı-qoǵamdyq sharalardyń bári kitaphanada ótip jatyr. Sebebi, balalardy jasyryp qalýǵa bolmaıdy. Balalar áleýmettik qoǵamǵa beıimdelip, elimizde óz ornyn tabýy tıis. Jumys istep, Otanyna qyzmet etýi kerek»,- dedi ádisker.

Mektep-ınternat oqýshylary sońǵy jyldary shashtaraz, tiginshi mamandyqtaryn ıgerip júr. Keıbiri qalypty stýdenttermen birge orta arnaýly, joǵary oqý oryndarynda bilim alady. Kóbi sýretshi, dızaın, ınformatıka sekildi sózdi qajet etpeıtin, qol jumysy mańyzdy mamamdyqqa basymdyq beredi. Al kolledj ben ınstıtýt, ýnıversıtette arnaıy mamandar bolmaǵan soń estimeıtin stýdentter ustazdyń erin qımylyn muqııat baqylap, sózderdi meńgeredi. Balalarǵa ata-ana tarapynan da kómek beriledi. Sońǵy jyldary elimizde estý qabileti tómen balalarǵa arnaıy ota jasalyp, dybys sezýge múmkindik berilgenimen bul qıyndyqtar men kedergilerdi túgel sheshýge múmkindik bergen emes. Bári ońaltý sharalaryna tikeleı baılanysty. Al asa qabiletti balalar mektepti bitirip, joǵary oqý ornyn támamdap, keıin ózderi bilim alǵan ordaǵa jumysqa ornalasady.