Keıbir aımaqtarda aýrýhanaǵa shuǵyl tártipte jatqyzylǵan naýqastardyń sany 3 paıyzǵa artty - E.Birtanov
STANA. Sáýirdiń 2-si. QazAqparat /Gúlmıra Álıakparova/ - Jyl basynan beri keıbir aımaqtarda aýrýhanaǵa shuǵyl tártipte jatqyzylǵan naýqastardyń sany 3 paıyzǵa artty. Bul týraly búgin QR Densaýlyq saqtaý mınıstrliginde Biryńǵaı ulttyq densaýlyq saqtaý júıesi men Densaýlyq saqtaý isin damytýdyń 2011-2015 jyldarǵa arnalǵan memlekettik baǵdarlamasynyń jobasyn talqylaýǵa arnalǵan respýblıkalyq keńeste vedomstvo basshysynyń orynbasary Eljan Birtanov málim etti,
dep habarlaıdy QazAqparat.
E.Birtanovtyń aıtýynsha, Biryńǵaı ulttyq densaýlyq saqtaý júıesi engizilgen 2010 jyldyń basynan beri keıbir aımaqtarda epıdemııalar men apatty jaǵdaılar oryn almasa-daǵy, aýrýhanaǵa shuǵyl jatqyzylýy tıis naýqastardyń sany 3 paıyzǵa artyp ketken. Onyń pikirinshe, kóp jaǵdaıda dárigerler shuǵyl túrde aýrýhanaǵa jatqyzý týraly joldamalardy qaterli emes dıagnozdar boıynsha jónsiz bergen. «Olardyń arasynda qajetti tekserýler men em-domdardy dárigerdiń joldamasynsyz-aq ótýge bolatyn jaǵdaılar bar», - deıdi ol.
Vıtse-mınıstr budan bylaı mundaı jaǵdaıdyń árqaısysyna saraptama júrgizilip, mınıstrlik jemqorlyq kózderiniń bul túrimen qatań kúresetinin qadap aıtty.
Óz kezeginde, QR Úkimeti basshysynyń orynbasary Erbol Orynbaev E.Birtanov pen vedomstvo basshysy J.Dosqalıevqa aýrýhanaǵa shuǵyl tártipte jatqyzylǵandardyń kórsetkishi kenet artqan oblystarǵa tekserister júrgizýdi tapsyrdy. «Aýrahana jaı ǵana emdelý úshin jatatyn shıpajaı emes, bul memlekettik qarajat. Naqty faktiler men kinálilerdi anyqtap, tabyńyz», - dedi ol.
Aıta keteıik, 2010 jyldyń basynan beri Qazaqstanda barlyǵy 114 myń naýqas emdeldi. E.Birtanovtyń aıtýynsha, Biryńǵaı ulttyq densaýlyq saqtaý júıesin engizýmen, aýyldyq eldi-mekenderden Almaty men Astana sııaqty iri qalalarǵa emdelýshiler kóptep aǵylady degen qaýip rastalmady jáne fakti boıynsha, óziniń turǵylyqty jerinen tys statsıonarlyq em alǵandardyń sany nebári 3 paıyzdy ǵana quraǵan.
