Keıbir aýyldyq jerlerde qajettilikke saı kelmeıtin úlken mektepter men densaýlyq saqtaý nysandary salynýda
ASTANA. Maýsymnyń 14-i. QazAqparat /Rýslan Ǵabbasov/ - Keıbir aýyldyq jerlerde salynyp jatqan mektepter men densaýlyq saqtaý nysandarynyń kólemi sondaǵy turǵyndardyń qajettiliginen áldeqaıda artyq.
Bul týraly búgin Úkimet otyrysynda Premer-Mınıstr Kárim Másimov málim etti.
«Bul másele aýyldyq jerlerdegi bilim berý men densaýlyq saqtaý nysandaryna qatysty. Aýyldyq jerlerdegi nysandarǵa arnalǵan qurylystyq normalar men erejeler qandaı da bir eldi mekenniń naqty qajettilikterine saı emes ekendigin birqatar oblystardyń ákimderi kóterip júr», dedi Úkimet basshysy.
«Keıbir faktilerge qaraǵanda, keıbir eldi mekenderde qajettilikten áldeqaıda artyq mektepter men densaýlyq saqtaý nysandary salynýda», - dep toqtaldy K. Másimov.
Premer-Mınıstrdiń sózine qaraǵanda, kelesi bıýdjettik tsıklge sáıkes qurylystyq normalarmen jáne tıisti sheshimdermen kirý kerek.
«Osyǵan baılanysty men tıisti tapsyrmany júkteımin. Atap aıtqanda bir aıdyń ishinde bul másele boıynsha naqty usynys jasaý qajet»,-dedi K. Másimov.
