Keıbir aýyldarǵa eń jaqyn ornalasqan órt sóndirý bólimsheleriniń aralyǵy 50-den 200 shaqyrymǵa deıin sozylady
ASTANA. 11 shilde. QazAqparat - 5 myń jáne odan da kóp turǵyndary bar 87 eldi mekende órtke qarsy qyzmet múldem joq.
Bul týraly búgin Astanada QR Tótenshe jaǵdaılar mınıstrliginiń ujymy men Májilis depýtattarynyń kezdesýi barysynda Órtke qarsy qyzmet komıtetiniń tóraǵasy Serik Áýbákirov málim etti.
«Órt sóndirý men birinshi kezektegi apattyq-qutqarý jumystaryn júrgizý úshin respýblıkada 408 órt depolary bar. Osy depolar arqyly 271 eldi meken qorǵalady. Osynyń ishinde 36 iri qala órtke qarsy qorǵaýmen tolyq kólemde qamtamasyz etilmegen. Al 5 myń jáne odan da kóp turǵyndary bar 87 eldi mekende órtke qarsy qyzmet múldem joq», - dedi ol.
Osy oraıda ol atalǵan másele boıynsha aýyldyq jerlerdegi ahýal kóńil kónshitpeıtinin aıta kele, keıbir aýyldarǵa eń jaqyn ornalasqan órt sóndirý bólimsheleriniń aralyǵy 50-den 200 shaqyrymǵa deıin sozylatynyn jetkizdi.
«Memlekettik órtke qarsy qyzmet bólimsheleriniń aýyldardan bundaı qashyqtyǵy órt kezinde jedel áreket etýge múmkindik bermeıdi», - dep atap ótti S. Áýbákirov.
Búginde jergilikti atqarýshy organdar tarapynan aýyldyq jerlerde órtke qarsy 4 myńnan astam erikti jasaqtar qurylǵan. Osy turǵyda 388 órt tehnıkasy men 7 myńnan astam beıimdelgen tehnıka tizbekteldi. Jyl saıyn erikti órt sóndirýshiler tilsiz jaý oryn alǵan jalpy kóleminiń 10 paıyzyn aýyzdyqtaıtyn kórinedi.
