Keıbir áýe kompanııalary ushaqtarynyń qaıda ekenin bilmeıdi - AAK
ASTANA. QazAqparat - Azamattyq avıatsııa komıteti tóraǵasy orynbasarynyń mindetin atqarýshy - bas memlekettik avıatsııalyq ınspektory Toty Ámirova áýe kompanııalarynyń avıatsııalyq qaýipsizdik erejelerin buzýyn toqtatpasa qatań sharalar qoldanatyndyǵyn málimdedi, dep habarlaıdy «QazAqparat» HAA tilshisi.
Azamattyq avıatsııa komıtetiniń ǵımaratynda búgin áýe kompanııalarynyń basshylary jınaldy. Toty Ámirovanyń aıtýynsha, keıde avıatsııalyq oqıǵalardy jasyryp qalatyn jaǵdaılar kezdesetin kórinedi. Sonyń saldarynan áýe apatynyń oryn alǵany jáne onyń qurbandaryn Komıtet elmen birge estip jatady.
«Osy sebepti sizderdiń barlyqtaryńyzdy búgin jınap otyrmyz. Qaýipsizdik erejeleriniń buzylýy jaǵdaıyna eshqandaı túsinistikpen qaraýǵa bolmaıdy. Jaza qoldanylýy kerek. Jyl basynan beri úsh áýe apaty tirkelip, bes adam mert boldy», - dedi Toty Ámirova.
Qazaqstannyń bas avıatsııalyq ınspektorynyń aıtyp otyrǵan úsh áýe apatynyń eń alǵashqysy ShQO aýmaǵynda tirkelgen bolatyn. 25 aqpanda Aıagóz aýdanynyń aýmaǵynda «Strekoza 7-Gazelle SA341» tikushaǵy qulap, ushqysh qaza tapqan. Ekinshi jaǵdaı boıynsha 27 shildede Almaty oblysynda ıAk-12M ushaǵynyń apatynan 2 adam kóz jumsa, 10 tamyz kúni oqý-jattyǵý barysynda «Tehnam 2002» áýe ushaǵy taǵy sol Almaty oblysynda qulaǵan bolatyn.
«Muny toqtatý kerek. Keı jaǵdaıda bizge ushaqtyń qulaǵany nemese janyp jatqany týraly jalǵan aqparattar kelip túsip jatady. Qaıta tekserý júrgizýge týra keledi. Keıde tipti áýe kompanııasynyń basshylary bir saǵat boıy ushaǵynyń qaıda ketkenin bilmeı jatatyn kezder bar», - deıdi Toty Ámirova.
Azamattyq avıatsııa komıtetiniń tóraǵasynyń orynbasary mindetin atqarýshy qatań sharalar qoldanylmasa, áýe kompanııalaryn lıtsenzııasyn aıyrý máselesi qaralatynyn jetkizdi.
