Keıbir aýdandyq gazetterdiń sapasy nege syn kótermeıdi
ASTANA. QazAqparat - Keıbir aýdandyq gazetterdiń sapasy nege syn kótermeıdi? Astanada ótip jatqan VIII Azamattyq forýmnyń sessııasynda Jambyl oblysy jastar uıymdary qaýymdastyǵynyń prezıdenti Islambek Dastannyń osy suraǵyna QR Aqparat jáne kommýnıkatsııalar mınıstri Dáýren Abaev jaýap berdi, dep habarlaıdy QazAqparat tilshisi.
«Aýdandyq gazetterdi «ash ta, jap» gazeti deımin. Sapasy syn kótermeıdi. Eń bastysy, ol gazetterge ishki saıasat bólimderinen qomaqty aqsha bólinedi. Sony ıgerý ǵana oılastyrylady. Halyq osyndaıda oqylmaıtyn aýdandyq gazetti nege alamyz dep narazy bolady», - dedi Islambek Dastan.
Bul suraqqa Dáýren Abaev bylaı jaýap berdi:
«Jambyl oblysyndaǵy aýdandyq gazetterdiń máselesin aıtyp jatyrsyz. Birinshiden, bizdiń mınıstrlik tek respýblıka boıynsha ǵana gazetter men saıttardy, teledıdarlardy qaraıdy. Aýdandyq, aýyldyq bolsyn nemese oblystyq deńgeıdegi memleket kómegi tek ákimdik arqyly júrgiziledi. Oǵan bizdiń eshqandaı qatysymyz joq. Olar bizge baǵynbaıdy, bizge aqparat bermeıdi. Olar ózderi turǵyndar qandaı gazetterdi oqıdy eken dep zerttep, kómektesý kerek. Ár oblystyń ákimdigi osyndaı jumys atqarady. Biz «osy myna aýdanda shyǵyp jatqan mynadaı gazetke mynansha aqsha ber» dep aıtpaımyz. Ony ákimdik tender arqyly sheship jatyr», - dedi Dáýren Abaev.
