Keıbir aýdan ortalyqtaryna jas mamandar ne sebepti barmaıdy
ASTANA. QazAqparat - Búgin Májiliste «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasyn talqylaý kezinde ne sebepti keıbir aýdan ortalyqtaryna jas mamandar barmaıtyndyǵy aıtyldy, dep habarlaıdy QazAqparat tilshisi.
Bul turǵyda Májilis depýtaty Murat Temirjanov aýdan ortalyqtaryna jas dárigerler nelikten tıisti deńgeıde barmaı jatqanyna pikir bildirdi.
«Dıplommen aýylǵa» memlekettik baǵdarlamasyn júzege asyrý máselesine toqtalǵan depýtat, «Máselen, elimizdiń soltústik óńirlerinde qala mártebesindegi aýdan ortalyqtary men aýyl deńgeıindegi aýdan ortalyqtary bar. Atap aıtqanda, Aqmola oblysynda aýdan ortalyǵy retinde Stepnıak qalasy (Birjan sal aýdany) ornalasqan, bul jerde 3 myń adam turady. Osy oblys aýmaǵyndaǵy aýdan ortalyǵy Zerendi aýylynda 4 myń adam ómir súrýde. Bul turǵyda Zerendidegi aýdan ortalyǵyna baǵyttalǵan jas dárigerler, muǵalimder «Dıplommen aýylǵa» baǵdarlamasyna qatysa alady. Al halyq sany az Stepnıak qalasyna barýǵa nıetti jas mamandardyń atalǵan baǵdarlamalarǵa qatysýǵa múmkindigi joq. ıAǵnı osyndaı qarama-qaıshy jaǵdaılar tıisti kedergiler týdyrýda. Qazaqstan boıynsha osyndaı qalalar, aýdan ortalyqtary 17-ge jetip otyr», - dedi.
Onyń paıymynsha, bul másele boıynsha jekeleı sheshim qabyldaý kerek. Óıtkeni bul aýdan ortalyqtaryna baǵdarlama aıasynda jas mamandar óz erkimen barýǵa nıet bildirmeıdi.
«Biz eldi mekenniń mártebesine qaraımyz ba, álde halyq sanyna nazar aýdaramyz ba? Nege bizdiń bıýdjettik sala qyzmetkerleri osydan zardap shegýi tıis? Sáıkesinshe, bul baǵdarlamalar atalǵan jerlerde jumys istemese, jas mamandardy eldi mekenderge kóptep tarta almaımyz», - dedi Murat Temirjanov.
Aıta keteıik, osyǵan deıin senator Birǵanym Áıtimova Jas mamandardy jemqorlardyń «shemasynan» qorǵaý qajettigin aıtqan bolatyn.
Al senator Dárıǵa Nazarbaeva jas mamandarǵa arnap, jataqhana salý máselesin kóterdi.
Májilis depýtaty Káribaı Musyrman «Dıplommen aýylǵa!» baǵdarlamasy talapqa saı qarjylandyrylmaı otyrǵandyǵyn aıtty.
