Keıbir ákimshilik quqyq buzýshylyqtar sottarda qaralmaıtyn bolady
NUR-SULTAN. QazAqparat - Parlament Májilisiniń jalpy otyrysynda palata depýtattary «QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy QazAqparat tilshisi.
Ruqsattan aıyrý nemese onyń qoldanylýyn toqtatý, qyzmetti toqtatý nemese tyıym salýdy kózdeıtin jekelegen ákimshilik quqyq buzýshylyq isterdi qaraýdy ýákiletti organdardyń quziretine berý eskerilip otyr.
«Konstıtýtsııalyq novellalar qoǵam men memleket ómiriniń barlyq salalaryn odan ári jańǵyrtýdyń berik irgetasyn qalady. Konstıtýtsııalyq reforma aıasynda atqarýshy memlekettik organdardyń jáne olardyń basshylarynyń jaýapkershiligi artty. Osyǵan baılanysty bul baǵytta júrgizilip jatqan memlekettik saıasat ákimshilik quqyq buzýshylyq týraly zańnamasynda da uqsas reformalardy talap etedi. Osylaısha, zań jobasy tek sotpen ǵana qoldanatyn ákimshilik jazalardy qaıta qaraýdy, sondaı-aq ýákiletti organdardyń quziretine olarmen óz betinshe qoldanylýy múmkin ákimshilik jazalardy jatqyzýdy usynady», - dep túsindirdi QR Ádilet mınıstri Marat Beketaev.
Atap aıtqanda, ákimshilik quqyq buzýshylyqtardyń jetpisten asa quramdaryn sottardan ýákiletti memlekettik organdardyń quziretine berý usynylady. Bul tulǵalardyń sot organdaryna daýsyz ister boıynsha júginý qajettiligin alyp tastaýmen qatar, memlekettik organdardyń jaýapkershiligin arttyrady.
Sonymen birge, azamattardyń isti sotta qaraýdy tańdaýǵa quqyǵy saqtalatyn bolady. ıAǵnı, bul ister boıynsha sot baqylaýy jalǵasady.
Munymen qosa, ákimshilik quqyq buzýshylyq týraly isterdi júrgizýdi elektrondyq formatqa aýystyrý qarastyrylǵan.
«Azamattar úshin ákimshilik quqyq buzýshylyq týraly isti qozǵaý jáne ony qaraý tártibi qarapaıym ári túsinikti, al aıyppuldardy tóleý júıesi memlekettik organdarǵa neǵurlym az barýmen qosa, múmkindiginshe yńǵaıly bolǵan mańyzdy. Osyǵan baılanysty Bas prokýratýranyń bastamasy boıynsha zań jobasynda Ákimshilik rásimderdiń biryńǵaı tizilim júıesin engizý bóliginde túzetýler qarastyrylǵan. Bul memlekettik organdardyń jáne ekinshi deńgeıdegi bankterdiń aqparattyq júıelerimen ıntegratsııalanatyn ákimshilik protsesi bar elektrondyq isti qalyptastyrýǵa múmkindik beredi», - dedi vedomstvo basshysy.
Aıta keteıik, atalǵan zań jobasy aıasynda ákimshilik quqyq buzýshylyq aıyppuldary mólsheri tómendeıtin bolady.
«Ákimshilik quqyq buzýshylyq sanktsııalaryna júrgizgen taldaý olardy ákimshilik jaýapkershilikti odan ári izgilendirý aıasynda jeńildetýge jáne tómendetýge múmkindik bar ekenin kórsetti. Memlekettik organdardyń jáne úkimettik emes uıymdardyń usynystary negizinde, sondaı-aq taldaý men statıstıkalyq derekterdi eskere otyryp, zań jobasymen qyryq tórt quram boıynsha aıyppul mólsherin azaıtý, on quram boıynsha ásire qatańdyqty tómendetý, alty quram boıynsha eskertý engizý usynylady», - dep atap ótti Marat Beketaev.
