Keı óńirlerge arnaıy mártebe bererde neni eskergen jón – sarapshy

ASTANA. KAZINFORM − «Astana halyqaralyq ýnıversıteti Joǵary quqyq mektebiniń professory Isıdor Borchashvılı Konstıtýtsııalyq reforma komıssııasynyń úshinshi otyrysynda jekelegen óńirlerde arnaıy quqyqtyq rejımder engizý týraly bastamany qoldady.

Onyń aıtýynsha, zamanaýı jaǵdaılarda memleketter damý protsesinde saralanǵan úlgilerdi jyldan-jylǵa jıi qoldanyp keledi. Bul ınvestıtsııalar, tehnologııalar jáne adamı kapıtal úshin básekege obektıvti jaýap bolyp otyr.

− Mundaı sıpattaǵy kez kelgen sheshim memlekettik qurylymnyń negizderine áser etetindikten, olar tikeleı konstıtýtsııalyq negizdi talap etedi. Jekelegen óńirlerde arnaıy quqyqtyq rejımdi belgileý óziniń quqyqtyq tabıǵaty boıynsha quqyqtyq retteýdiń jalpy rejıminen erekshe jaǵdaı bolyp sanalady, - dedi I. Borchashvılı elordada Konstıtýtsııalyq sot ǵımaratynda.

Professor mundaı sheshimder erkin nemese jaǵdaıǵa qaraı qabyldanbaýǵa tıis ekenin, tek aıqyn konstıtýtsııalyq shekter bolǵanda ǵana jol berilýi kerektigin atap ótti.

− Munda konstıtýtsııalyq qaǵıdattardan bas tartý týraly sóz joq. Kerisinshe, usynylyp otyrǵan norma mundaı sheshimderdi quqyqtyq keńistiktiń birligin saqtaý, zań aldyndaǵy teńdik qaǵıdaty jáne azamattardyń konstıtýtsııalyq quqyqtary men bostandyqtaryn qamtamasyz etý talaptarymen tikeleı baılanystyrady. Bul rette teńdik uǵymy jaǵdaılardyń formaldy biregeıligi retinde emes, quqyqtyq aıqyndyqtyń, qorǵalýdyń jáne ashyqtyqtyń teń deńgeıi retinde túsindiriledi, - dedi I. Borchashvılı.

Eske sala ketsek, Ádilet mınıstri Erlan Sársembaev jekelegen aýmaqtarǵa arnaıy mártebe berý múmkindigin Konstıtýtsııaǵa engizýdi usynǵan edi.