Keı óńirde úsik júrip, keı aımaqta +38 gradýs bolady

ASTANA. KAZINFORM –  ASTANA. KAZINFORM — «Qazgıdromet» RMQ aldaǵy úsh kúnge arnalǵan aýa raıy boljamyn jarııalady.  

Aldaǵy kúnderi respýblıka aýmaǵynda aýa raıyn Ońtústik tsıklon qalyptastyrady. Soǵan baılanysty 6–8 mamyr aralyǵynda elimizdiń batysynda, soltústik-batysy men soltústiginde, al 8 mamyrdan bastap ortalyq, shyǵys jáne ońtústik óńirlerde jańbyr jaýyp, naızaǵaı oınap, kúndiz burshaq túsýi múmkin. 

6–7 mamyrda Batys Qazaqstan jáne Atyraý oblystarynda, 7 mamyrda Mańǵystaý oblysynda, 7–8 mamyrda Aqtóbe oblysynda qatty jańbyr jaýady.

Tek Qaraǵandy oblysynda ǵana jaýyn-shashynsyz aýa raıy boljanyp otyr. 8 mamyrda respýblıkanyń ońtústik-batysy men ońtústik-shyǵysynda shańdy daýyl kóterilýi múmkin.

6 mamyrda Pavlodar men Abaı oblystarynda, 6–7 mamyrda Shyǵys Qazaqstan oblysynda túngi jáne tańerteńgi ýaqytta úsik júredi dep kútiledi.

Aýa temperatýrasy kúndiz batys óńirlerde 23–30 gradýstan 21–26 gradýsqa deıin tómendeıdi. Soltústik-batys, soltústik jáne shyǵys aımaqtarda 20–25 gradýstan 24–29 gradýsqa deıin kóteriledi. Ortalyqta 22–30 gradýstan 27–35 gradýsqa deıin, al ońtústikte 31–38 gradýs, ońtústik-shyǵysta 25–32 gradýstan 30–38 gradýsqa deıin ysıdy. 

Aıta ketelik búgin antıtsıklon saldarynan elimizdiń basym bóliginde aýa raıy jaýyn-shashynsyz ári jyly bolady.