Keı óńirlerde «Qazaqstan Barysynyń» irikteý saıystary shalaǵaı ótýde - joba avtory Arman Shoraev
ASTANA. QazAqparat - Qazaq kúresin damytýǵa beı-jaı qaraǵan óńirlerge qatań eskertý jasaldy. Bul týraly búgin Astanada ótken baspasóz máslıhatynda «Qazaqstan Barysy» jobasy ıdeıasynyń avtory Arman Shoraev málim etti.
«Meniń oıymsha, halyqtyq baqylaýdyń máni zor. Ásirese, aýdandyq, oblystyq irikteýlerden ádil ótý óte jaýapty másele. Sondyqtan jergilik jerlerde «Nur Otan» partııasy arqyly halyqtyq baqylaýǵa senimimiz zor. Ókinishke qaraı, keıbir oblystarda osy kúnge deıin irikteý jarystary shalaǵaı ótip keledi. Sonyń barlyǵyn joıý úshin «Nur Otan» partııasy men QR Sport jáne dene shynyqtyrý isteri agenttigi tarapynan tıisti qadaǵalaý bolady degen oıdamyn», - dedi A.Shoraev. Onyń sózine qaraǵanda, irikteý jarystarynda byltyr Qaraǵandy oblysy túgel qamtylmady. Osyǵan baılanysty osy óńirdegi jaýapty vedomstvolarǵa qatań eskertý jasaldy. Bul turǵyda A.Shoraev bıyl osyndaı jaǵdaı qaıtalanǵan oblystardyń ókilderi aqtyq saıysqa engizilmeıtinin atap ótti. Óz kezeginde QR Sport jáne dene shynyqtyrý isteri agenttiginiń tóraǵasy Tastanbek Esentaev jergilikti jerlerde «Qazaqstan Barysynyń» sapaly ótýine qatysty tıisti tapsyrmalar berilgenin atap ótti.
