Keı mekeme basshylarynda áleýmettik jaýapkershilik degen joq - vıtse-premer

Elimizde 600 myńnan astam adam qaýipti oryndarda jumys isteıdi. Bul týraly Jibek Joly telearnasynyń «Ýáde» baǵdarlamasyna bergen suhbatynda Premer-Mınıstrdiń orynbasary Tamara Dúısenova aıtty, dep habarlaıdy Kazinform.

«Qazirgi ýaqytta qaýipti jumys oryndarynda 600 myńnan astam adam eńbek etip júr. Jumys berýshi olardyń qosymsha kásibı zeınetaqy qoryna jarna tólep otyrady. Kim sol jarnany tólep otyrsa, sol azamattardyń báriniń múddesi qorǵalady. Olarǵa arnalǵan standarttar bar. Kıimi bolýy tıis. Tańerteń jumysqa kelgende densaýlyǵyn tekserýden ótkizý qajet. Qosymsha tamaqtanýy kerek. Bul Eńbek mınıstrligi tarapynan atqarylady. Tótenshe jaǵdaılar mınıstrliginde ónerkásiptik qaýipsizdik komıteti bar. Ol sondaǵy qural-jabdyqtardyń durys jumys isteýin baqylaıdy», — dedi Tamara Dúısenova.

Onyń atap ótýinshe, osydan 5-6 jyl buryn «ArselorMıttal Temirtaý» kompanııasy men ónerkásiptik qaýipsizdik komıteti arasynda jol kartasy qabyldanǵan.

«Sol jol kartasy aıasynda kóp jumys isteldi. Jumys istelmedi deýge bolmaıdy. Eńbek ınspektsııanyń arqasynda „ArselorMıttal“ óz jabdyqtaryn jóndeýge 50 mlrd teńge qarjy jumsady. Sol jumys kartasy tolyq oryndaldy dep aıta almaımyz. Sonyń janynda („ArselorMıttal“ óndiris oshaqtarynyń) „Qazaqmys“ mekemesi jumys istep jatyr. Eki mekemeniń qaýipsizdik salasynda atqarǵan jumysyn salystyrsaq, árıne, jer men kókteı. Ókinishke qaraı áleýmettik jaýpkershilik keı mekeme basshylarynda bar, keıbirinde joq», — dedi vıtse-premer.