Keı kezderi alaqol qurylysshylar nysandardy tolyq aıaqtamaı paıdalanýǵa beredi - E.Aıtýǵanov
ASTANA. QazAqparat - Búgin Astana qalalyq máslıhatynyń otyrysynda qurylysy bitip, paıdalanýǵa beriletin áleýmettik, mádenı jáne turǵyn-úı sapasyna qatysty máseleler talqylandy, dep habarlady astana.kz.
«Jyl sońyna deıin 1200 orynǵa eseptelgen 9 mektepti tapsyrý kózdelgen. Sondaı-aq qazirgi ýaqytta 15 mekteptiń jáne 15 mektepke deıingi mekemeniń qurylysy jalǵasýda. Jańa nysandarǵa jol salý, elektr energııasyn, jylý men sý tartý máseleleri Jolaýshylar kóligi jáne avtomobıl joldary basqarmasy jáne Kommýnaldyq sharýashylyq basqarmasymen birlesip sheshiledi. Alaıda, keı kezderi alaqol qurylysshylar nysandardy qurylys jumystaryn tolyq aıaqtamaı paıdalanýǵa beredi, osyǵan baılanysty jańa kompanııany izdeýge týra keledi», - dedi Astana qalasy Qurylys basqarmasy basyshysynyń mindetin atqarýshy Erjas Aıtýǵanov. Qalalyq máslıhat depýtattary obektini paıdalanýǵa berýdi muqııat baqylap, joldar men turaq salý, aýlany abattandyrý jumystaryn júrgizbeı turǵyn úı keshenin qabyldamaý kerektigin kóterdi.
