Kevın Speısı Ózbekstanda aıaq astynan aýrýhanaǵa túsip qaldy
Amerıka akteri Kevın Speısı ınfarkt alýy múmkin degen kúdikpen Tashkent aýrýhanasyna jatqyzyldy. The Sun brıtan basylymynyń habarlaýynsha, ony qarap, teksergen dárigerler alańdaýǵa negiz joq ekenin aıtqan, dep habarlaıdy QazAqparattyń menshikti tilshisi.
64 jastaǵy Kevın Speısı 29 qyrkúıek pen 3 qazan aralyǵynda ótken XV Tashkent halyqaralyq kınofestıvaline qatysý úshin Ózbekstanǵa kelgen.
«Kartadan turǵyzylǵan úı» pen «Amerıka sulýy» juldyzy júrek talmasy kúdigimen Tashkenttegi medıtsınalyq mekemege jetkizildi.
Akter Samarqandaǵy Afrasıab kóne qalasy mańynda mýzeı qabyrǵasyndaǵy sýretterdi tamashalap júrgende ózin nashar sezingen.
Akterdiń sol qoly birneshe sekýnd qozǵalmaı qalǵany habarlandy.
Speısı Tashkentte MRT tekseristen ótip, kúdigi rastalmady.
Keıinirek ol sahnaǵa shyǵyp, kórermenderge bári jaqsy ekenin aıtty.
«Bul jaǵdaı bizdiń ómirimiz qanshalyqty qyl ústinde turǵany jaıynda oılandyrdy», - dedi akter.
Kevın Speısı – amerıkalyq teatr jáne kıno akteri, kınorejısser, stsenarıst, prodıýser. Kóptegen fılm men serıalǵa túsken.
«Kádimgi kúdiktiler», «Amerıka sulýy» fılmderi men «Kartadan turǵyzylǵan úı» serıaly úshin «Oskar» (1996, 2000), BAFTA (2000), «Altyn globýs» (2015), «Tonı» (1991) jáne «Gremmı» (2006) syılyqtaryna laıyq dep tanylǵan.
