Keýdesin oqqa tosqan batyr umytylmaıdy - Halyq Qaharmany Ǵazız Baıtasov jaıly

Jambyl oblystyq Polıtsııa departamentinen habarlanyp otyrǵandaı, azamattardy qutqarý jolynda, beıbitshilik pen tynyshtyq úshin óz ómirin qurban etken kóptegen polıtsııa qyzmetkerleriniń esimi ІІM tarıhynda jazýly tur. Olar urpaq júreginde máńgi qalary daýsyz. Opat bolǵandardyń qatarynda polıtsııa kapıtany Ǵazız Baıtasov ta bar. Ol 2011 jyldyń 12 qarashasynda Taraz qalasynda terrorlyq akt saldarynan qaza tapty. QR Tuńǵysh Prezıdenti, Elbasy Nursultan Nazarbaevtyń Jarlyǵymen oǵan qaıtys bolǵannan keıin Halyq Qaharmany ataǵy berildi.

...Jambyl oblysy ІІD Jol polıtsııasy jeke batalonynyń 1-vzvodynyń komandıri, polıtsııa kapıtany Ǵazız Baıtasov sol kúni arnaıy kólikpen kezekshilikte júrgen edi. Qazybek bı kóshesindegi ortalyq gastronomnyń janyna qylmysker toqtaı qalyp, qorshaǵandardyń bárine oq jaýdyra bastady: kólikter, vıtrınalar, adamdar - qanquıly qylmyskerge báribir edi. Kólikti toqtatqan Ǵazız, odan shyǵa sala qarsy oq atyp, qylmyskerdi keri shegindiredi. Djıptiń artyna jasyrynyp, kólikterdi bóget retinde paıdalana otyryp, qaskúnem kenetten Ǵazızdiń keýdesinen oq atqan edi - quqyq qorǵaýshy da qarap qalmady.

Ǵazız qylmyskerdiń qolynda granata baryn bildi. Beıbit halyqqa qaýip-qaterdiń tóngenin anyq sezindi. Sekýndtardyń ózi altynǵa bergisiz sát týdy. Aýyr jaralanǵanyna qaramastan, polıtsııa kapıtany terrorıstpen betpe-bet kelip, denesin qolmen ustap, ony jerge qulatty. Osy kezde jarylys «burq» ete tústi.

Osyndaı erlikke baryp, kópti qutqarǵan Ǵazız Baıtasov kim edi?

Batyr 1971 jyly 3 sáýirde Jambyl qalasynda Ábdibek Baıtasov pen Gúlzat Shirkeevanyń otbasynda dúnıege kelgen. Úlken uly Ǵazız ben úsh qyzy - aıalaǵan áke men ananyń baqyty edi. Keıin otbasy Jambyl oblysy Sverdlov aýdanynyń Túımekent aýylyna kóship keldi. Ǵazız aýylda 1988 jyly orta mektepti bitirgen.

«Ǵazızdi mektepte barlyǵy - muǵalimder de, oqýshylar da jaqsy kóretin. Oqý barysynyń ózinde kóshbasshylyq, prıntsıpke beriktik jáne ashyqtyq sııaqty qasıetteri anyq baıqalatyn. Ol barlyq isterde - sporttyq, mádenı-buqaralyq sharalarda kóshbasshy boldy. Biz synyptastarmen osy kúni jıi jınalamyz, synyp jetekshisi Aızada apaıǵa baramyz, sol jyldardy jylylyqpen eske alamyz. Biz Ǵazızdi maqtan tutamyz. Ýaqyt aınalyp kelse de, ol báribir osyndaı erlik jolyn tańdaıtyn edi», - deıdi Jambyl oblysy Polıtsııa departamenti patrýldik polıtsııa batalony komandıriniń orynbasary, Ǵazızdiń synyptasy ári dosy Shaızat Álipbaev.

Mektepten keıin Ǵazız Baıtasov Sovet áskeriniń qataryna shaqyryldy. 1992 jyly Jezqazǵan polıtehnıkalyq ýnıversıtetiniń Qarataý fılıalynyń syrttaı bólimine «avtokólik sharýashylyǵy» fakýltetine oqýǵa tústi. Polıtsııadaǵy qyzmeti 1993 jyly Jambyl oblystyq ІІB ýaqytsha ustaý ızolıatorynyń aıdaýyl qyzmetinde bastaldy. Fakýltettegi oqýyna baılanysty 1996 jyly jol polıtsııasynyń ınspektory qyzmetine aýysqan edi. 2010 jyly Jambyl oblysy ІІD ІІBB 1-vzvod komandıri bolyp taǵaıyndaldy. Polıtsııa kapıtany qyzmeti barysynda qylmyskerlerdi ustaý kezinde sheber is-áreketteri jáne jumystaǵy jaqsy kórsetkishteri úshin ІІD basshylyǵynyń Alǵys hattarymen, baǵaly syılyqtarmen birneshe ret marapattalǵan.

Jambyl oblysynyń polıtseıleri opat bolǵan áriptesine qurmet kórsete otyryp, el batyryn jıi eske alady. Halyq Qaharmany polıtsııa kapıtany Ǵazız Baıtasovtyń esimi polıtsııa departamentiniń jeke quramynyń tizimine engizilgen.

Quqyq qorǵaýshynyń otbasy da nazardan tys qalmaǵan. Olarǵa árdaıym moraldyq jáne materıaldyq kómek kórsetilip keledi.

Eske sala ketsek, osy aıdyń basynda Qazaqstan Prezıdenti Qasym-Jomart Toqaev Ǵazız Baıtasovtyń otbasymen kezdesken bolatyn. Memleket basshysy jumys sapary barysynda batyrdyń otbasy turyp jatqan úıge bardy. Prezıdentke polıtseıdiń qurmetine qoıylǵan eskertkish taqta, onyń fotosýretteri, medaldary men jeke zattary kórsetildi. Qasym-Jomart Toqaev Halyq qaharmanynyń jubaıymen jáne uldarymen áńgimelesý barysynda Ǵazız Baıtasovtyń óte jaýapty ári qıyn sátte óz isine adal bolǵanyn, onyń erligi eshqashan umytylmaıtynyn atap ótti.