Keýdemdegi áıel donordyń júregi áli soǵyp tur - Jánibek Ospanov

Júrek kúni degende, esimizge 2012 jyldyń jazy oraldy. Sol jyldyń jazynda qazaq medıtsınasy úlken bir beleske kóterildi. Qazaqstan medıtsınasynda alǵash ret mıy jumysyn toqtatqan adamnyń júregi basqa bireýge donor boldy.

Bolǵan jaıtty bir eske alyp ótsek, 2012 jyldyń 6-shy tamyzynda Astana qalasynda 46 jastaǵy áıel mıyna qan quıylyp, aýrýhanaǵa túsedi. Medıtsına tilimen aıtsaq, ol «óli adam» edi. Biraq onyń júregi birqalypty soǵýyn toqtatpaǵan. Buny kórgen, onyń ústine Qostanaı oblysy, Rýdnyı qalasynyń 38 jastaǵy turǵyny Jánibek Ospanovqa jedel túrde júrek aýystyrý kerek ekenin biletin dárigerler birden tıisti sharalardy qolǵa alady. Olar eń aldymen 46 jastaǵy áıeldiń uly - Igor Vorotnıkovqa habar beredi.

 

«Anamnyń mıy ólgenin habarlap, soǵyp turǵan júregin basqa adamǵa aýystyryp salýǵa bolatynyn aıtty. Men áli de bolsa apparatpen onyń ómirin saqtap turýǵa bolatyn shyǵar dep oıladym. Alaıda, bizde ondaı apparat joq eken. Kóp oılandym. Sodan naýqasty kórýge ruqsat berdi. Oıymnan anam ketpedi. Ol adamdy, onyń otbasyn kórip, anam bul sheshimime qarsy bolmaıtynyn túsindim. Átteń, anam sol kezde eshkimniń suraǵyna jaýap qaıta almaıtyn kúıde edi... áıtpese, sheshimimdi qoldaıtyn edi. Al qazir Jánibekke qarap, anamnyń júregi soǵyp turǵanyn bilemin. Keshe túnde anamnyń júregi ómir syılaǵan adamnyń jary ómirge qyz bala alyp keldi. Anamnyń júregi soǵyp turǵan adam bolashaqta taǵy bir «anany» tárbıeleıdi», - degen edi sol 2012 jyly suhbat bergen Igor. 

«Elimizde 20 myńǵa jýyq adam donorǵa zárý. Al jyl saıyn Qazaqstanda 15 myńǵa jýyq adam mıyna qan quıylyp qaıtys bolsa, 3 myńǵa jýyq adam jol apattarynan qaza tabady. Solardyń saý organdaryn donorǵa paıdalansa, joǵarydaǵy 20 myń adamnyń birazyna biz ómir syılaıtyn edik. Igor shynymen azamattyq jasady. Ol ómirge qaıtyp kelmeıtin anasynyń júregin donorlyqqa berý arqyly bir adamnyń, búıregin alýǵa ruqsat berý arqyly ekinshi adamnyń ómirin aman alyp qaldy », - degen edi Qazaqstannyń dárigerler qaýymy.

 

Mine, arada tórt jyl ótken soń Jánibek Ospanov jańa júrek onyń ómirinde jańa múmkindikterge jol ashqanyn aıtyp otyr. Bir qyzyǵy, Jánibekke Igordyń anasynyń júregin aýystyrǵannan keıin bir kúnnen soń Jánibek qyzdy bolǵan edi. Al, tórt jyldan keıin Jánibek uldy bolyp otyr eken.

«Tórt jyl buryn maǵan bóten adamnyń júregin salǵan  edi... Qazir densaýlyǵym óte jaqsy deýge bolady. Úsh aı buryn ulym dúnıege keldi. Byltyr men Eýropadaǵy dostaryma baryp keldim, ıaǵnı,  alys jerlerge baryp-kelip turýǵa densaýlyǵym jarap tur. Bıyl jazda Fınlıandııaǵa sport sımpozıýmyna bardym. Júregim bunyń bárine múmkindik berip tur. Qazir sport - kúndelikti serigim deýge bolady. Fınlıandııaǵa barǵanda, Eýropanyń klınıkalary men sııaqty adamdar úshin sport - qabyldaıtyn dári sııaqty óte mańyzdy ekenin ǵylymı túrde dáleldep berdi» - deıdi Jánibek densaýlyǵy týraly aıta otyryp.

Al, anasynyń júregin donorlyqqa bergen Igormen únemi habarlasyp turady eken. Tipti, týǵan baýyryndaı bolyp ketipti.

«Igormen únemi aralasyp turamyn. Basynda árıne aýyr boldy... Men bóten qalanyń aýrýhanasynda jalǵyz jattym. Onyń anasy qaıtys boldy, jumysynda qıyndyq boldy... Qazir barlyq qıyndyq artta qaldy. Igor ekeýmiz únemi aralasyp, otbasymyzdaǵy  jańalyqtardy aıtyp otyramyz», - deıdi Jánibek.

Al «jańa» júrek sizdiń keýdeńizde qalaı ómir súrip jatyr?» degen suraqqa Jánibek: «jańa júrek jańa múmkindikterge jol ashty. Men jumys isteımin, ómir súremin, otbasymdy ózim asyraımyn. Úsh aı buryn ulym  dúnıege keldi...Mine, Igor maǵan qarap, anasynyń júregi osylaı soǵyp turǵanyna qýanady ǵoı. Men uzaq jyldar boıy aýyrdym, al Igor anasynan aıyryldy. Biraq, mine, sonyń sońynan bir jaqsylyq shyǵyp, ómirge sábı keldi. Ulyma Álibek degen at berdim»-deıdi J.Ospanov.

Al, sońǵy derekterge súıensek, jyl saıyn álem boıynsha 17 mıllıon adam júrek-qan tamyr aýrýlarynan kóz jumady eken.