Ketrın Konnollı Irlandııa prezıdenti bolyp saılandy

ASTANA. KAZINFORM — Táýelsiz kandıdat Ketrın Konnollı Irlandııa prezıdenti saılaýynda jeńiske jetti, dep habarlaıdy TASS.

Onyń jeńisi týraly qarsylasy — bıleýshi koalıtsııa quramyndaǵy tsentrıstik «Fıne gel» partııasynyń kandıdaty Hızer Hamfrıs málimdedi.

— Ketrın bárimizdiń prezıdentimiz bolady. Ol meniń de prezıdentim. Oǵan bar jaqsylyqty tileımin jáne eshnársege ókinbeımin, — dedi Hamfrıs RTE telearnasynyń efırinde.

BAQ derekterine sáıkes, daýys berýdiń túpkilikti nátıjeleri búgin jarııalanbaq. RTE málimetinshe, Konnollıdiń jeńisi kútpegen jaıt bolǵan joq, saýalnamalar dál osyndaı nátıjeni boljaǵan.

Konnollı saılaýǵa táýelsiz kandıdat retinde qatysqanymen, ol «Shınn feın» ulttyq partııasy men solshyl kúshterdiń qoldaýyna ıe boldy. Ol Reseıdiń Ýkraınadaǵy áreketterin synǵa alady, biraq sonymen birge NATO-ny qaqtyǵysty arandatyp otyr dep aıyptaıdy, Eýropanyń «áskerı baǵytqa bet burýyna» alańdaýshylyq bildiredi jáne Irlandııanyń beıtarap mártebesin saqtaýdy jaqtaıdy. Gazadaǵy jaǵdaıdy Konnollı «genotsıd» dep ataıdy. Politico basylymy 2025 jyly onyń kózqarastaryn «batysqa qarsy», «NATO-ǵa qarsy» jáne «aıqyn antıızraıldik» dep sıpattaǵan.

Qyzmettegi prezıdent Maıkl Hıggıns 2011 jyldan beri bılikte jáne óziniń ekinshi jetijyldyq merzimin 11 qarashada aıaqtaıdy. Irlandııa — parlamenttik respýblıka, munda prezıdent negizinen ókildik qyzmet atqarady, alaıda ol memlekettiń basshysy jáne qarýly kúshterdiń joǵarǵy bas qolbasshysy bolyp qala beredi.

Ketrın Konnollı el tarıhyndaǵy prezıdent bolǵan úshinshi áıel atandy. Ol turmysta, eki eresek uly bar.

Eske sala keteıik, Irlandııa prezıdenttigine Konor Makgregor da túspek bolǵan, biraq keıin bul oıynan bas tartqan.