«Ketchýp pen nan»: Dımash jelidegi ázilge qatysty pikir bildirdi

ASTANA. KAZINFORM — TikTok jelisinde Dımash Qudaıbergenniń The Story of One Sky atty ániniń úzindisi keń tarap, jastar arasynda ázil-qaljyń týdyrdy.

Aqtaýda ótken kontsert kezinde ánniń sózderin túsinbeı qalǵan keı kórermen áleýmettik jelide «kechýp pen nan» dep ándetken. Buǵan ózge qoldanýshylar da qosylyp, «ketshi sen bar», «keshir, Dılnaz», «et jeısiń be» syndy óz nusqalaryn jarysa jazady.

Degenmen, keı oqyrman mundaı áreketterdi qarańǵylyq pen mádenıetsizdikke balap, syn aıtty. Shyn máninde, Dımash ánde «We’re choosing life» — qazaqsha «biz ómirdi tańdaımyz» degen sózdi aıtqan. Ánniń túpki máni — ekologııa, adamzattyń bolashaǵy men beıbit ómir týraly tereń fılosofııalyq oılarǵa qurylǵan.

Tarap ketken vıdeo men ázilderge qatysty ánshiniń ózi Instagram paraqshasynda pikir bildirip, ázildi durys qabyldaıtynyn jetkizdi.

— Barshańyzǵa sálem! Búgin meniń jerlesterim áleýmettik jelilerde meniń «Bir aspannyń tarıhy» atty shyǵarmamdy belsendi túrde talqylap jatqanyn bildim. Aıtady ǵoı, eger saǵan qaljyń aıtylsa, demek sen tirisiń jáne qyzyqtysyń. Shyǵarmashylyq ázilder men yqylastaryńyz úshin, tipti kútpegen formada bolsa da, rahmet, qurmetti jerlester.

Al meniń álemniń túkpir-túkpirindegi súıikti jankúıerlerim, árqashan qorǵap, shynaıylyq pen jaqsylyqty jaqtap júrgenderińiz úshin kóp raqmet. Sizderdiń sózderińiz men úshin mýzyka sekildi, — delingen jazbada.

Aıta ketelik Dımash Qudaıbergen Aqtaýdaǵy túrki álemine arnalǵan kontsertte óner kórsetken edi.