Kesirtkege pıtstsa, sıyrǵa zebra órnegi: Shnobel syılyǵynyń qyzyq zertteýleri jarııalandy

ASTANA. KAZINFORM – Boston ýnıversıtetinde Shnobel syılyǵynyń 35-shi mereıtoılyq marapattaý rásimi ótti. Bul syılyq kúlkili ári bir mezet oılandyratyn ǵylymı zertteýlerge beriledi.

Nıgerııa, Togo, Italııa jáne Frantsııa ǵalymdary belgili bir kesirtkeniń ártúrli pıtstsa túrlerine talǵamyn zerttegeni úshin marapattaldy.

Germanııalyq zertteýshiler Frıts Renner men Djessıka Vertmann shetel tilinde sóılegende alkogoldiń (shamaly mólsherde) sóıleý qarqynyn arttyratynyn dáleldegen eńbekteri úshin syılyqqa ıe boldy. Avtorlardyń aıtýynsha, zertteý ıdeıasy Venadaǵy konferentsııada sharap iship otyrǵan sátte týyndaǵan.

Pedıatrııa salasynda syılyq ananyń sarymsaq jegen kezdegi ıisi emshektegi balaǵa qalaı áser etetinin zerttegenderge berildi.

Ádebıet atalymynda amerıkalyq ǵalym Ýılıam Bın 35 jyl boıy óz tyrnaǵynyń ósýin sıpattap otyrǵan eńbegi úshin qaıtys bolǵannan keıin marapattaldy.

Japondyq ǵalymdar sıyrlardy zebra tárizdi etip boıaý arqyly olardyń shybyn shaqqannan az zardap shegetinin dáleldep, bıologııa salasynda syılyq aldy.

Úndi ınjenerleri sporttyq aıaq kıimnen shyǵatyn ıisti joıatyn arnaıy tuǵyr ázirlegeni úshin marapattaldy.

Sondaı-aq maqtaý sózdiń ultshyldyqqa yqpalyn zerttegen psıhologtar men «teflon dıetasyn» usynǵan hımıkter de syılyq ıegerleri atandy.

Dástúr boıynsha jeńimpazdarǵa ár jyldardaǵy Nobel syılyǵynyń laýreattary marapat tapsyrady. Negizgi syılyqtan bólek, ǵalymdarǵa sımvolıkalyq túrde ázil syılyq beriledi, ol 10 trıllıon dollarlyq jalǵyz kýpıýra. Bul naqty aqsha emes, tek qaǵazǵa basyp shyǵarýǵa bolatyn bir japyraq sýret qana.

Eske salsaq, buǵan deıin Los-Andjeleste televızııalyq óner salasyndaǵy «Emmı» syılyǵynyń 77-shi marapattaý rásimi ótken bolatyn.