Kesken-Kúıik: kóne qalanyń jańa qupııalary zerttelip jatyr
Jobany Eýrazııany zertteý qoǵamynyń qarjylyq qoldaýymen «Rutrum» JShS qolǵa aldy. Qazaqstandaǵy jetekshisi – tarıh ǵylymdarynyń kandıdaty Dmıtrıı Voıakın.
- Tsıtadeldegi qazba jumysy barysynda 6 qurylys nysany, birneshe qaıta qurylý kezeńi jáne bir bólmedegi altarlyq oryndardyń 5 deńgeıi anyqtaldy. Qurylys qabattarynyń birinen jaqsy saqtalǵan moneta tabyldy. Aldaǵy zertteýler eskertkishtiń hronologııasyn naqtylaýǵa múmkindik beredi, - dep málimdedi Qazaly aýdandyq mádenıet bólimi.
Kesken-Kúıik qalashyǵy ejelgi derekkózderde Hývara qalasy dep atalady. Hý «jaqsy qala», var «oryn» degen maǵynany bildiredi.
- Kólemi jaǵynan bul qala osy aımaqta astana bolǵan Jankent qalashyǵynan asyp túsedi. Zertteý barysynda zamanaýı geodezııalyq túsirilim, 3D-skanerleý, fotogrammetrııa jáne aerofototúsirilim ádisteri qoldanyldy, - delingen habarlamada.
Mamandar ejelgi shahardy júıeli zertteý Qazaly óńiriniń kóne tarıhy men mádenı murasyn ǵylymı turǵydan zerdeleýge yqpal etedi dep esepteıdi.
Eske salaıyq, Mádenıet jáne aqparat mınıstrliginiń josparyna sáıkes bıyl Qyzylorda oblysyndaǵy respýblıkalyq mańyzy bar tarıhı-mádenı eskertkishter restavratsııadan ótip jatyr.
