Keshirmeımin, balań jaýap beredi: Qarjaýbaı Nurymov kıkiljiń qalaı bastalǵanyn aıtty

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Sot otyrysynda Sherzattyń ákesi Qarjaýbaı Nurymov jábirlenýshi retinde sóz sóıledi. Onyń aıtýynsha, 3 qazan kúni ol jumystan keıin dúkenge baryp, jalǵyz ózi saýda jasaǵan. Keshki ýaqytta Darhan Áskentaı kelip, syra suraǵan. Satýshy men satyp alýshy arasynda tólemge baılanysty túsinbeýshilik bolǵan.

— Darhan keldi. Ekeýmizdiń aramyzda eshqandaı urys-keris bolǵan joq. Taǵy 1-2 jigit keldi. Sol aralyqta Darhan syra surady. Men 23:00–den keıin syra satpaımyz dep eskerttim. Ótinip qoımaǵannan keıin berdim. Ol bireýge habarlasyp, aqsha aýdardy, ony WhatsApp-tan kórsetti. Ol Qaltaeva dep kórsetti. Men Svetlanadan tústi dedim. Ol ózi ony túsingen joq. Biraq sol jerde eseptesip shyǵyp ketken. Ol mas boldy, ishimdiktiń ıisi shyǵyp turdy. Sondyqtan kóp salǵylaspaı jibere salǵym keldi, — dedi ol.

Qarjaýbaı Nurymov saýda jasalǵannan keıin balasy Sherzat kelgenin atap ótti. Aıtýynsha, ol telefonyn qýattaǵyshqa qoıyp, dúkende dosyn shyǵaryp salý úshin qalǵan. Sol arada D.Áskentaı dúkenge qaıta kelgen.

— Darhan qaıta aınalyp kirdi. Aramyzda taǵy da áńgime boldy, telefonyn qýattaǵyshqa qoıyp berdim. Sony bala estip qaldy. Sosyn aldymen Darhan, onyń artynan bala dalaǵa shyqty. Tereze ashyq bolatyn, ekeýiniń daýys kóterip sóılesip jatqanyn estip, shyǵam degenshe bala uryp jiberdi. Ekeýin ajyratyp, balama eskertý jasadym. Darhannan keshirim suradym. Men syrttaı tanıtynmyn, bizdiń aýylda aǵamnyń dosy bar, bul sonyń baldyzy eken. «Júr aýrýhanaǵa aparaıyn, aqyńdy tóleıin, bolmasa ishimdigińdi bereıin» dep aıttym. Ol «keshirmeımin, balalardy shaqyramyn, balań jaýap beredi, densaýlyǵyn qoıyp tastaıdy» dedi, — dep eske aldy jábirlenýshi.

Onyń aıtýynsha, D.Áskentaı dúken artyna ketip, áldebireýlerge telefon arqyly habarlasqan. Al Qarjaýbaı Nurymov inisi Nurqanatty shaqyrǵan.

— Birinshi Nurbol keldi, ol mas eken. Kólikte jas jigit boldy. «Kim soqty» degen áńgimeler boldy. Men balaǵa ashýlanbasyn dep «men urdym» dedim. Nurbol «tanymaısyńdar ma, men Nurbolmyn, hýtorskıı» dep aıtty. Sosyn «Darhan jetim bala ǵoı, nege urasyńdar» dep eskertti. Túsindirgennen keıin úsheýi ketken sekildi boldy. Biraq 5-10 mınýtta qaıta aınalyp keldi. Tólem týraly surady, men túsindirdim. Nurbol tólem jasady da, kassa jaqqa qaraı ótip ketti. Dóreki sóıledi. Men Nurbolǵa tıiskem joq. Dúkende maı kesetin pyshaq boldy. Sony dalaǵa alyp shyǵyp Darhanǵa bardym. Ol Nurbolǵa durys emes aqparat berip tur ǵoı. Balam men Nurqanat ajyratyp aldy. «Keshirim suradyq, ne qalap tursyń? Densaýlyǵyn qoıyp tastaıdy degen ne áńgime» dedim. Sosyn kólikten jas bala (D.Ysqaq) keldi, oǵan túsindirdim, ol saý boldy. Ol Nurbolǵa mán-jaıdy túsindirdi. Ketken boldy da, taǵy aınalyp keldi, — dedi Qarjaýbaı Nurymov.

Aıtýynsha, sottalýshylar ketken sátte Nurqanat, Sherzat úsheýi dúken ishinde sóılesken. Nurqanat Ǵaıypbaev dúkendi jaýyp ketýge qarsy bolǵan. Sebebi sottalýshylar úılerine barady dep kúdiktengen. Osy oqıǵalardan keıin «Qamajaı» dúkenine birneshe kólik kelip, arty qaıǵyly oqıǵaǵa ulasqan.

Eske salaıyq, buǵan deıin sotta Sherzat óliminiń negizgi sebebi ataldy.

Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.

Prokýror oqıǵanyń tolyq hronologııasyn baıandady. 

Aıyptalýshylardyń kópshiligi kinásin moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzattyń aǵasy óli tabyldy. 

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.